Францияда номаълум шахслар телекоммуникация тармоқларига зарар етказди

Францияда темирйўлларда ўт қўйиш содир этилган қатор ҳужумлардан уч кун ўтиб, мамлакат телекоммуникация тармоқларига ҳужум уюштирилди. Франциянинг бир қанча ҳудудларида 29 июл, душанба куни номаълум шахслар бир нечта алоқа операторларининг оптик толали тармоқларига зарар етказди. Франция ҳукуматининг рақамли технологиялар бўйича давлат котиби Марина Феррари ижтимоий тармоқларда қатор департаментларда француз телекоммуникация компанияларига зарар етказилганини билдирди.

Унинг сўзларига кўра, ҳужумчиларнинг ҳаракатлари интернетга оптик толали, шунингдек, стационар ва мобил телефон алоқалари орқали кириш бўйича «маҳаллий оқибатларга олиб келади». «Мен бу қўрқоқ ва масъулиятсиз ҳаракатларини қаттиқ қоралайман», - деди Феррари ва шикастланган объектларни тиклаётган мутахассисларга миннатдорчилик билдирди.

Франция матбуотига кўра, Франциянинг 101 департаментидан олтитасида зарар қайд этилган, Олимпия ўйинлари ўтказилаётган Парижга эса зарар етмаган. Франция жанубида, Париж яқинидаги Уаза ва Люксембург билан чегара яқинидаги Мёз департаментларида душанбага ўтар кечаси кабеллар узилиб, француз телекоммуникация компаниялари SFR, Free ҳамда Bouygues Telecom’га тегишли қурилмалар бузиб ташланди, деб хабар берди Le Parisien газетаси ва BFM TV телеканали. Зарар миқдори ҳозирча номаълум, тергов бошланди. Бироқ, янги воқеалар ва уч кун олдин темирйўлда содир этилган қўпорувчилик ўртасида боғлиқлик бор-йўқлиги ҳозирча аниқ эмас.

Франция ҳукумати сўлларни темирйўлларда қўпорувчилик уюштирганликда гумон қилмоқда 

Айни вақтда, Франция ҳукумати 26 июл куни Олимпиада очилиши кунида тезюрар темирйўлларга уюштирилган ҳужумларда сўл қанот экстремистик кучлар вакилларини гумон қилмоқда. «Биз бир неча кишининг профилини аниқладик», деди Франция ички ишлар вазири Жералд Дарманен France 2 телеканалида. Унинг сўзларига кўра, ҳужумчилар иш услуби улар ўта сўл гуруҳларга мансублигини кўрсатади.

Айни пайтда Францияда темирйўл ҳаракати тўлиқ тикланди, деди транспорт вазири Патрис Вергриет RTL телеканалига. Барча поездлар ўз йўналишларида одатдаги жадвалига мувофиқ ҳаракатланяпти. Бундан ташқари, 800 минг йўловчи темирйўлда қўпорувчиликдан жабр кўргани қайд этилган. 

Франция шимолида гумондор қўлга олинди

Оммавий ахборот воситалари, шунингдек, Франция шимолида темирйўл операторининг техник бинолари калитлари, асбоблар ва сиёсий адабиётларга эга бўлган шахс темирйўл вокзалларидан бири ҳудудида ҳибсга олингани ҳақида хабар берди. Le Figaro газетасининг ёзишича, гап ўта сўл фаол ҳақида кетмоқда. Париж прокуратурасининг аниқлик киритишича, бу ҳибсга олиш темирйўлда ўт қўйиш билан боғлиқ терговга алоқадор эмас. Диверсия иши бўйича ҳозирча ҳибсга олинганлар йўқ.

26 июл куни Франциянинг тезюрар темирйўл тармоғига ўт қўйилиши оқибатида зарар кўрган ҳудудлардаги поездларнинг 30 фоизга яқини қатновини бекор қилишга мажбур бўлди. Франция шимолий, ғарбий ва шарқида поездлар ҳаракатининг деярли учдан бир қисми бекор қилинган. Бундан ташқари, Лондон ва Париж ўртасидаги Eurostar тезюрар поездларининг тахминан чорак қисми ишламаган. Кузатувчиларга кўра, Париждаги Олимпиада очилишига бир неча соат қолганида Францияда деярли бутун тезюрар темирйўл тармоғи ишламай қолган.