Қўшимча функционаллар
-
Тунги кўриниш
Янги Зеландия интернет-магнат Ким Доткомни АҚШга топширади
Қўшма Штатлар унинг экстрадициясини 2012 йилдан бери сўраб келади.
Янги Зеландия ҳукумати Megaupload сервиси асосчиси Ким Доткомни АҚШга топширишга қарор қилди. Reuters’нинг ёзишича, адлия вазири Пол Голдсмит бу борадаги тегишли ордерни имзолаган.
Голдсмитнинг таъкидлашича, ҳукумат Доткомга кейинги юридик қадамларини ўйлаб олиши учун «қисқа муддат беради».
Дотком ўзининг экстрадиция қилиниши ҳақидаги хабарни изоҳлар экан, Янги Зеландияни «Тинч океанининг жанубий қисмида жойлашган Американинг итоаткор мустамлакаси» деб атади.
Ким Дотком — 2005-2012 йиллар давомида фаолият юритган Megaupload файл алмашишга мўлжалланган сервис асосчиси. Ўз вақтида у одамлар энг кўп ташриф буюрадиган дунёдаги топ-15 сайтлар қаторида бўлган.
Серверлари Гонконгда жойлашган Megaupload АҚШ ҳукуматининг талаби билан ёпилган эди — айбловда сайт фаолияти натижасида муаллифлик ҳуқуқи эгаларига 500 миллион доллар зарар етказгани айтилган.
АҚШ 2012 йилдан бери Янги Зеландиядан Доткомнинг экстрадициясини сўраб келади. 2017 йилда суд уни АҚШга топшириш бўйича қарор қабул қилган. Дотком Янги Зеландия Олий суди орқали ушбу қарорнинг бекор қилинишига эришган, аммо экстрадиция бутунлай тақиқланмаган эди.