«Чегара билмас шифокорлар» Россиядаги фаолиятини тўхтатганини эълон қилди

«Чегара билмас шифокорлар» (MSF) халқаро нотижорат ташкилоти 32 йилдан сўнг Россиядаги фаолиятини мажбурий тўхтатганини маълум қилди. Бу ҳақда 16 сентябр, душанба куни унинг сайтида чоп этилган пресс-релизда айтилади. Россия Федерациясини тарк этишга Адлия вазирлигидан ННТнинг Россиядаги филиалини хорижий нодавлат ташкилотлари реестридан чиқариш тўғрисидаги қарори сабаб бўлди.

«Мамлакатдаги дастурларимизни якунлаганимиздан жуда қайғудамиз, чунки тиббий ва гуманитар ёрдамга муҳтож бўлган кўплаб одамлар энди биз кўрсата оладиган ёрдамсиз қолади», - дейилади MSF баёнотида. Шу билан бирга, ташкилот «иложи бўлса, Россияда ишлашни давом эттиришни хоҳлашини» таъкидлади.

2024 йил август ойи ўрталарида Россия Адлия вазирлиги Россия Федерациясидаги халқаро гуманитар ташкилотларнинг лицензияларини бекор қилди. Хусусан, «Чегара билмас шифокорлар» ва «Дунё шифокорлари» ташкилоти чекловга учради. Вазирлик расмий сабаб сифатида нодавлат нотижорат ташкилотларининг «фаолияти ўз низомига мос келмаслиги»ни кўрсатган. Ташкилотларга Россиядаги ваколатхоналарини тугатиш ва ҳисобларини ёпиш учун бир ой муддат берилди.