Sotheby’s Маурицио Каттеланнинг банан инсталляциясини 1,5 млн доллар қийматда сотувга қўяди

Sotheby’s кимошди уйи энг машҳур ва провокацион санъат асарларидан бири — италиялик ижодкор Маурицион Каттеланнинг Comedian номли инсталляциясини сотувга қўйди. Унинг тахминий қиймати 1-1,5 миллион долларни ташкил этади.

Comedian — бу деворга сантехниклар ишлатадиган скотч ёрдамида ёпиштирилган банандан иборат концептуал санъат асаридир. У 2019 йили Art Basel Miami Beach ярмаркасида намойиш этилган. Асарда рассом томонидан Маямидаги озиқ-овқат дўконидан харид қилинган банандан фойдаланилган.

Каттелан ушбу асарининг учта нусхасини яратган. Уларнинг иккитаси шахсий коллекционерларга 120 минг долларга сотилган, учинчиси эса энг қиммат нархга харид қилинган (унинг қиймати ошкор этилмаган) ва кейинроқ Ню-Йоркдаги Соломон Гуггенхайм музейига совға қилинган.

Мазкур асар арт-ҳамжамият ва ОАВда кенг муҳокамаларга сабаб бўлганди. Инсталляцияга бўлган қизиқиш рассом Девид Датун девордаги бананни юлиб олиб, кўргазмага ташриф буюрган юзлаб меҳмонлар кўз ўнгида еб қўйганидан кейин янада ортиб кетган.

Санъатшуносларнинг бу борадаги фикрлари иккига бўлинади. Бир қисми буни порвокация деб атайди. Қолганлар эса унда рассом Марсел Дюшаннинг концептуал ишларига ишорани кўради. Ижодкорнинг ўзи эса 2021 йилда Art Newspaper’га берган интервьюсида бананни «изоҳ-иш» ва «биз қадрлайдиган нарсалар ҳақида мулоҳаза» деб атаганди.

Энди эса учта банандан бири 1-1,5 миллион доллар оралиғида кимошди савдоларига қўйилмоқда. Бунча маблағни тўлаган инсон унинг эвазига банан, елим тасма, ҳақиқийлигини исботловчи сертификат ва инсталляцияни ўрнатиш бўйича рассомдан батафсил қўлланмага эга бўлади.