16 декабр янгиликлари: Ўзбекистонда рўй берган муҳим воқеа ва ҳодисалар

Ишдан олинган қарийб 300 раҳбар, оширилаётган бензин таъминоти, Қўқонда тепа қаватдан йиқилган талаба қиз ва енгил жазо олган ҳайдовчининг ҳукмига протест — кун давомида Kun.uz’да ёритилган Ўзбекистон янгиликлари билан таништирамиз.

Иқтисодий комплексда қарийб 300 нафар раҳбар ишдан олинди

Президент Шавкат Мирзиёев видеоселектор йиғилишида маҳаллаларда камбағалликни қисқартириш ишлари ва 2025 йил учун вазифалар муҳокама қилинди. Сайхунобод, Уйчи, Зарбдор ва Ғиждувондаги ижобий натижалар таъкидланди: 3,3 млн аҳоли доимий даромадга эга бўлди, хонадонларнинг ўртача даромади 7,5 миллион сўмдан 10,5 миллион сўмгача ошди.

Аммо айрим раҳбарларнинг сусткашлиги танқид қилиниб, иқтисодий комплексда 297 нафар раҳбар ишдан олинди. Уларнинг ўрнига ташаббускор ёшлар тайинланди. Президент «Одамлар муаммосини ҳал қилмаган раҳбар ишламайди», деб таъкидлади йиғилишда.

2025 йилда 5 млн аҳолини даромадли қилиш, 1,5 млн кишини камбағалликдан чиқариш режалаштирилди. Ҳудудлар раҳбарлари янги ёндашувларни жорий қилиши ва тадбиркорликни ривожлантириши лозим. Президент бу борада 2025 йилни ҳал қилувчи йил деб атади.

Бензин таъминоти оширилмоқда

Энергетика вазирлиги маълумотига кўра, совуқ об-ҳаво туфайли айрим газ заправкалари фаолияти чеклангани сабабли биржа савдоларидаги автобензин ҳажми сезиларли равишда оширилди.

2024 йил 6 декабргача АИ-80 бензинидан биржага кунига 2000 тонна чиқарилган бўлса, 10 декабрдан бошлаб бу миқдор тўрт баравар кўпайиб, 8000 тоннага етказилди. Шунингдек, АИ-92 бензини ҳам кунлик 4000 тоннадан савдога қўйилмоқда.

13 декабр куни 8000 тонна АИ-80 бензини савдога қўйилган бўлиб, унинг 7780 тоннаси сотилган. Ҳукумат талаб ва таклифга қараб бензин ҳажмини яна ошириш имконияти борлигини таъкидламоқда.

Ушбу чоралар мамлакатдаги ёқилғи таъминотини яхшилаш ва эҳтиёжни қондиришга қаратилган.

2030 йилда Ўзбекистон иқтисодиёти 200 миллиард долларга етиши кутилмоқда

Ҳиндистоннинг Business Central Asia журналида таъкидланишича, сўнгги йилларда Ўзбекистон иқтисодиёти икки баравар ўсиб, 100 млрд долларлик маррадан ошган.

2024 йилда аҳоли жон бошига даромад 3 минг долларга, экспорт ҳажми эса 25 млрд долларга етиши кутилмоқда. Олтин-валюта захиралари 40 млрд доллардан ошган.

“Ўзбекистон – 2030” стратегиясида иқтисодиёт ҳажмини 160 млрд долларга етказиш мақсад қилинган бўлса-да, суръатлар юқори бўлгани сабабли бу кўрсаткич 2030 йилга 200 млрд долларга етиши мумкин, дейилади журнал мақоласида.

Мазкур ўсиш аҳоли фаровонлигини ошириш ва турмуш сифатини яхшилашга асос бўлиши айтилмоқда.

Ягона тизимга бирлаштириладиган коммунал хизматлар

Яқин икки йил ичида барча коммунал хизматлар ягона пакетга бирлаштирилиб, битта субъект томонидан тақдим этилиши кутилмоқда. Бу ҳақда «Миллий тикланиш» партияси раиси Алишер Қодиров маълум қилди.

Қодировнинг таъкидлашича, чиқинди ва электр энергияси тўловлари бир тизимга уланган бўлиб, яқин орада газ ва сув тўловлари ҳам шу тартибга ўтади. Қарздорликлар умумий қилиб ҳисобланади ва сифатсиз хизматлар учун жазо чоралари кескинлаштирилади.

Маълумотларга кўра, чиқиндиларни олиб чиқиш бўйича дебитор қарздорлик 596 млрд сўмни ташкил этиб, йил бошидан 115 млрд сўмга кўпайган. Тартибсиз тизимга инвесторларни жалб этиш қийин бўлгани учун, ягона самарали тизим яратиш мақсад қилинган.

Қўқонда талаба қиз 3-қаватдан йиқилди

Қўқон давлат педагогика институти талабаси 12 декабр куни талабалар турар жойининг 3-қаватидан тушиб кетган. Воқеага институтнинг жисмоний маданият факултети 2-курс талабаси дугоналари билан ўзаро келишмовчилиги сабаб бўлгани айтилмоқда.

Бироқ вазирлик манбасига кўра, талаба қизнинг ушбу ҳаракати оиладаги келишмовчиликлар билан боғлиқ бўлиши мумкин. Ҳодисадан сўнг, жабрланувчи зудлик билан шифохонага олиб борилган ва жонлантириш бўлимига жойлаштирилган.

Айни пайтда, Қўқон шаҳар прокуратураси ҳолат юзасидан текширув ишларини олиб бормоқда.

Эслатиб ўтамиз, бу талабалар турар жойи илгари ҳам қизларнинг хоналарига яширин камера ўрнатилиши орқали жамоатчилик эътиборига тушган ва ушбу иш бўйича масъул ходимлар жаримага тортилган эди.

Ҳайдовчига енгил жазо қайта кўрилади

Янгийўлда йўл-транспорт ҳодисаси содир этиб, 5 нафар болани босиб кетган ва икки нафарининг ўлимига сабабчи бўлган ҳайдовчи Рустамжон Мирзаҳатамовга нисбатан енгил жазо тайинлангани танқид қилинди.

Суд томонидан унга ахлоқ тузатиш жазоси қўлланган. Тошкент вилоят прокуратураси Жиноят кодексининг 266-модда 3-қисми «а» банди асосида унинг жазосини кучайтиришни талаб қилиб, кассация протестини киритди. Бу моддада 10 йилгача озодликдан маҳрум қилиш жазоси назарда тутилган.

Kun.uz аввалроқ ушбу ҳукмга танқидий муносабат билдириб, Янгийўл судининг адолатсиз қарорлари ҳақида хабар берганди. Шунингдек, ўша судда ўлим билан тугаган яна бир автоавария ишида айбдор ҳайдовчига 2 йиллик озодликдан маҳрум қилиш жазоси тайинланган эди. Ҳар икки ишга судя Улуғбек Ибрагимов раислик қилган.

Прокуратура бу қарорларни қайта кўриб чиқишга ҳаракат қилмоқда.