Страдиварининг уч аср олдинги скрипкаси аукционда 11,3 млн долларга сотилди

Ню-Йоркдаги Sotheby’s аукциони орқали Антонио Страдиварининг скрипкаси 11,3 миллион долларга сотилди, деб хабар беради Associated Press. Мазкур скрипка тахминан 1714 йилда ясалган.

Joachim-Ma Stradivarius скрипкаси — Страдиварининг энг яхши мусиқий асбобларидан бири ҳисобланади. У устанинг «олтин даври»да ясалган.

Sotheby’s маълумотларига кўра, скрипка бой тарихга эга: айнан у буюк бастакор Йоганнес Брамсни «Ре мажор скрипкаси учун концерт»ини яратишга илҳомлантирган, шунингдек, 1879 йилда ушбу санъат асарининг премерасида фойдаланилган.

«Ушбу скрипка моҳирлик ва классик мусиқа тарихининг чўққисини ўзида мужассам этади. Унинг ўзига хос оҳанги ва бой ўтмиши бутун дунё бўйлаб коллекционерлар ҳамда мусиқачилар эътиборини тортди», — дейди Sotheby’s раиси Мари-Клаудия Хименес.

Мазкур скрипкага икки нафар машҳур бастакор эгалик қилган: венгриялик скрипкачи Йозеф Йоахим ва хитойлик мусиқачи Ма Сиҳонг. Манинг ўлимидан кейин оила скрипкани Бостондаги Янги Англия консерваториясига топширган. Энди эса уни сотишдан тушган маблағлар талабалар стипендияси учун йўналтирилади.

Страдиварининг жами 650 га яқин мусиқий асбоби сақланиб қолган. Joachim-Ma Stradivarius буюк мусиқачилар ва бастакорларга боғлиқ бўлгани, шунингдек, уч асрдан бери ўзгармай келаётган ўзига хос товуши сабаб алоҳида аҳамият касб этади.