Францияда криптомиллионерларни ўғирлаш иши бўйича 20 дан ортиқ шахс ҳибсга олинди

Париж ва Нантда криптотрейдерларнинг ўғирланиши билан боғлиқ иш доирасида 20 дан ортиқ одам ҳибсга олинди.

Терговга алоқадор AFP манбаларининг қайд этишича, қўлга олинганларнинг олти нафарига 1 май куни Парижда криптовалюта ортидан бойлик тўплаган фуқарони ўғирлаш айблови қўйилган. Ўғрилар бир неча миллион евро миқдорида пул талаб қилган. Жабрланувчи Париж яқинидаги уйда ушлаб турилган. Хавфсизлик кучлари томонидан 3 май куни ўтказилган рейдда ушбу фуқаро қутқарилган.

13 май куни жиноятчилар Paymium криптовалюта компанияси ижро директори Пер Нуазнинг қизи ва набирасини ўғирлашга уринган. Ўткинчи киши туфайли одам ўғирлашга уриниш муваффақиятсиз тугаган. У ҳужум қилган шахсларга қарши ўт ўчиргичдан фойдаланиб, қаҳрамонлик кўрсатган. Мазкур иш бўйича қўлга олинганларнинг аниқ сони ошкор этилмаяпти.

Маълумотларга кўра, 26 май куни Нантда криптовалюта саноатига боғлиқ яна бир одам ўғирлаш жиноятининг олди олинган. Ҳозирча ҳодиса тафсилотлари маълум эмас.