Актёр Роберт Дювал вафот этди

АҚШда «Оскар» соҳиби, «Чўқинтирган ота», «Бугунги Апокалипсис» ва бошқа ўнлаб филмларда роллар ижро этган актёр Роберт Дювал 95 ёшида вафот этди.

Унинг рафиқаси Лусиана томонидан эълон қилинган баёнотда айтилишича, актёр якшанба куни Виржиния штатидаги уйида оламдан ўтган.

Роберт Дювал ўз «Оскар»ини 1984 йилда «Нозик мурувват» (Tender Mercies) филмидаги кантри-мусиқачи роли учун олганди.

Дювал яна олти марта иккинчи пландаги энг яхши актёр сифатида (жумладан, «Чўқинтирган ота» ва «Бугунги Апокалипсис» филмларидаги роллари) «Оскар» учун номзодлик қилган. У охирги бор 2014 йилда, 83 ёшида «Ҳакам» филмидаги ижроси орқали номзодлар рўйхатига кирганди.

Режиссёр Френсис Форд Копполанинг «Апокалипсис» филмида Дювал сёрфинг ишқибози бўлган америкалик полковник Билл Килгорни ўйнаган – у Вагнернинг «Валкириялар парвози» мусиқаси садолари остида вертолётларнинг Ветнамдаги қишлоққа ҳужумни бошқариши саҳнаси дунё кинематографиясидаги энг машҳур саҳналардан бирига айланган.

Дювалнинг қаҳрамони экранда атиги бир неча дақиқа кўриниш берган, аммо «Валкириялар парвози» билан рол ҳамда «Эрталабки напалм ҳидини севаман» ибораси уни юлдузга айлантирган.

Шу билан бирга, бу персонаж аввалига янада телба бўлиши кўзда тутилганди, аммо Дювалнинг ўзи командир образини бироз мулойимроқ қилади.

Роберт Дювал ўзининг севимли роли сифатида 1989 йилда «Ёлғиз кабутар» телесериалидаги ковбойга айланган техаслик рейнжер Огастес Маккрей ролини тез-тез тилга олган.

Дювал кинода 63 йил муқаддам дебют қилган, ўшанда у «Мазахчининг ўлдирилиши» асари саҳналаштирилишида иштирок этганди.

«Чўқинтирган ота»да эса у мафия бошлиғининг маслаҳатчиси Том Ҳейгенни ўйнаган.

«Бутун дунё учун у актёр, „Оскар“ мукофоти совриндори, режиссёр, ҳикоячи эди. Мен учун эса у ҳамма нарса эди. Унинг ўз касбига бўлган иштиёқи фақат қаҳрамонларга, яхши таомга ва мулоқотга бўлган чуқур муҳаббати билан таққосланиши мумкин эди», – дейилади Люсиана Дювалнинг баёнотида.