«Toshkent teleradiokanali» «Oltin qalam» XI Milliy mukofoti uchun o‘tkazilgan xalqaro tanlovda Bosh milliy mukofotga loyiq topildi

«Turkiston» saroyida 3 may kuni Jurnalistika sohasida “Oltin qalam” XI Milliy mukofoti uchun xalqaro tanlov g‘olib va sovrindorlarini taqdirlashga bag‘ishlangan tadbir bo‘lib o‘tdi. 

Tadbirda senatorlar, deputatlar, turli vazirlik va idoralar, jamoat tashkilotlari vakillari, matbuot xizmatlari, ommaviy axborot vositalari xodimlari, mamlakatimizda faoliyat ko‘rsatayotgan xorijiy diplomatik korpus va xalqaro tashkilotlar vakillari ishtirok etdi. 

O‘zbekiston Jurnalistlari ijodiy uyushmasi raisi o‘rinbosari, «Oltin qalam» XI Milliy mukofoti uchun xalqaro tanlov tashkiliy qo‘mitasi raisi O‘.Mirzayorov va boshqalar Prezidentimiz Islom Karimov rahnamoligida ommaviy axborot vositalari izchil rivojlanayotgani, jurnalistlar har tomonlama qo‘llab-quvvatlanayotgani soha xodimlarini yangi ijodiy marralar sari ilhomlantirayotganini ta'kidladi. 

Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasiga muvofiq ommaviy axborot vositalari faoliyatiga oid milliy qonunchilik takomillashtirildi. O‘zbekiston Respublikasining «Davlat hokimiyati va boshqaruvi organlari faoliyatining ochiqligi to‘g‘risida»gi qonuni fuqarolarning axborot sohasidagi huquqlarini to‘la ta'minlash, davlat hokimiyati va boshqaruvi organlarining qabul qilinayotgan qarorlar sifatini oshirish yuzasidan mas'uliyatini kuchaytirish, ular faoliyati haqida jamoatchilikni keng xabardor etishga xizmat qilmoqda. 

Prezidentimiz tashabbusi bilan ta'sis etilgan “Oltin qalam” Milliy mukofoti uchun xalqaro tanlov sohani yanada rivojlantirishda muhim ahamiyat kasb etmoqda. Jahon matbuot erkinligi kuniga bag‘ishlangan tanlov O‘zbekiston Jurnalistlari ijodiy uyushmasi, Jurnalistlarni qayta tayyorlash markazi tomonidan O‘zbekiston mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi, Elektron ommaviy axborot vositalari milliy assotsiatsiyasi, Milliy teleradiokompaniya, Madaniyat va sport ishlari vazirligi, “Uzreport” axborot agentligi va O‘zbekiston Kasaba uyushmalari federatsiyasi kengashi hamkorligida o‘tkazilmoqda. 

Tanlov televideniye, radio, bosma ommaviy axborot vositalari va internet-jurnalistika yo‘nalishlari bo‘yicha o‘tkaziladi. Unda bitta Bosh milliy mukofot, har bir yo‘nalish bo‘yicha uchtadan mukofot hamda “Eng yaxshi matbuot xizmati” va “Eng yaxshi fotoreportaj uchun” rag‘batlantiruvchi nominatsiyalar ta'sis etilgan. 

“Oltin qalam” tanlovida o‘tgan yillar davomida 5 mingga yaqin jurnalist 70 mingga yaqin ijodiy materiali bilan qatnashgan. Bu yilgi tanlovda 510 ijodkor 8 ming 500 ga yaqin materialni taqdim etgan. 

“Oltin qalam” XI Milliy mukofoti uchun xalqaro tanlovda Bosh milliy mukofot sohibi, televideniye, radio, bosma ommaviy axborot vositalari va internet-jurnalistika yo‘nalishlari bo‘yicha g‘oliblar, shuningdek, “Eng yaxshi matbuot xizmati”, “Eng yaxshi fotoreportaj uchun” rag‘batlantiruvchi mukofotlar sohiblari aniqlandi. 

Tanlov doirasida O‘zbekiston Xotin-qizlar qo‘mitasi, Kasaba uyushmalari federatsiyasi kengashi, Mustaqil bosma OAV va axborot agentliklarini qo‘llab-quvvatlash va rivojlantirish jamoat fondi rag‘batlantiruvchi mukofotlarini ta'sis etgan. Shuningdek, BMTning O‘zbekistondagi vakolatxonasi Axborot markazi, YuNeSKO, YuSAID, “Mintaqaviy muloqot” (Sloveniya), Germaniya Xalq universitetlari assotsiatsiyasi kabi qator xalqaro tashkilotlar vakolatxonalari ham “Oltin qalam” tanlovida o‘z mukofoti bilan qatnashdi. 

Ijodiy loyihani o‘tkazish bilan bog‘liq sarf-xarajatlar O‘zbekiston Respublikasi Oliy Majlisi huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash jamoat fondi mablag‘lari hisobidan moliyalashtirildi. 

«Toshkent teleradiokanali» DUK ijodiy jamoasi «Oltin qalam» XI Milliy mukofoti uchun o‘tkazilgan xalqaro tanlovda Bosh milliy mukofotga loyiq topildi. G‘olib maxsus diplom, “Oltin qalam” ko‘krak nishoni, statuetkasi va mamlakatimizda belgilangan eng kam ish haqining 200 barobari miqdoridagi pul mukofoti bilan taqdirlandi. 

– Prezidentimiz tomonidan media soha vakillariga ko‘rsatilayotgan yuksak e'tibor va g‘amxo‘rlikni, doimiy rag‘batni kundalik faoliyatimizda his etmoqdamiz, – deydi «Toshkent teleradiokanali» direktori M.Safarov. – Mamlakatimizda kechayotgan demokratik islohotlar jarayoni jamiyat hayotining barcha jabhalarida, yurtdoshlarimiz tafakkurida, taqdirida mislsiz ijobiy o‘zgarishlar yasamoqda. Bunday mas'uliyatli jarayonda jurnalist so‘zining ta'sirchanligini yanada oshirish, yon-atrofdagi voqea va hodisalarga teran, sezgirlik bilan munosabatda bo‘lish bizning eng asosiy burchimizdir. 

G‘olib va sovrindorlarga diplom va sovg‘alar, pul mukofotlari topshirildi. San'at ustalari va yosh ijrochilar ishtirokida konsert namoyish etildi. 

Tadbirda O‘zbekiston Respublikasi Bosh vazirining o‘rinbosari B.Hodiyev so‘zga chiqdi. 

Nazokat Usmonova, A'lo Abdullayev (surat), O‘zA