14:36 / 05.06.2016
6491

96 yoshli yaponiyalik dunyodagi eng keksa bitiruvchi bo‘ldi

Yaponiya g‘arbida joylashgan Takamatsu shahrida yashovchi 96 yoshli Sigemi Xirata dunyoning eng keksa bitiruvchisi sifatida Ginness rekordlari kitobida qayd etildi.

Xirata 1919 yilning 1 sentabr kuni tug‘ilgan. U 85 yoshida she'riyat ilmini o‘rganishni maqsad qiladi va Kioto san'at va dizayn universitetiga o‘qishga kiradi. U o‘qishni tugallashi uchun 11 yil talab etiladi.

“Men baxtliman. O‘qish – mening yoshimda juda yoqimli bo‘lar ekan”, - deb uning so‘zlaridan iqtibos keltiradi “Kiodo” agentligi.

"Mening maqsadim 100 yoshni ko‘rish. Men o‘shanda ham o‘zimni yaxshi his qilsam, o‘qishni yana davom ettiraman va ilmiy daraja olishga urinib ko‘raman", deya qo‘shimcha qiladi Xirata.

U atrofida yaxshi odamlar va uzoq yillik do‘stlari qurshab turishini uzoq umr ko‘rishi siri sifatida aytib o‘tgan. Xirataning 2 farzandi, 5 nabirasi hamda 4 nafar evarasi bor.

Top