Adidas brendi Ecco’ni sudga berdi

Adidas sport anjomlarini ishlab chiqaruvchi nemis brendi Daniyaning Ecco kompaniyasini o‘zining poyafzallari dizaynini ko‘chirishda ayblab, sudga berdi. Bu haqida finans.dk internet-portali ma'lum qildi. 

 “Ecco’ning qasddan o‘ylangan, maqsadli va yovuz niyatli harakatlari uch chiziqli mashhur Adidas brendiga qoplab bo‘lmaydigan zarar yetkazdi”, - deyiladi hujjatda. 

Da'vo hajmi hozircha belgilanmagan, biroq nashrning ta'kidlashicha, 2008 yilda Adidas Amerikadagi  Payless Shoesource poyafzal do‘konlari tarmog‘idan 65 million dollar undirib olishga muvaffaq bo‘lgan. Oregon okrug sudi do‘konni Adidas modellaridan nusxa ko‘chirishda hamda nemis kompaniyasining savdo markasi elementlarini noqonuniy ekspluatatsiya qilishda aybdor deb topgan. Dastlab 305 million dollar tovon puli belgilanib, keyinchalik uning hajmi pasaytirilgan. 

Uch parallel chiziq – Adidas’ning 1949 yilda ro‘yxatdan o‘tkazgan tovar belgisi. Nemis kompaniyasining pul aylanmasi 2015 yilda 18,5 milliard dollarni tashkil qildi. Daniyaning Ecco’sida esa shu paytdagi ko‘rsatkich 1,3 milliardga teng.