Olland Brexit bo‘yicha «qattiq» muzokaralar bilan tahdid qildi

Fransiya prezidenti Fransua Olland Buyuk Britaniya bosh vaziri Tereza Meyni ogohlantirib, YeI Brexit bo‘yicha muzokaralarda jiddiy pozitsiyasini egallashini ta'kidlagan. Bu haqda Associated Press agentligi xabar qilmoqda.

Birlashgan qirollik bosh vaziri YeIdagi hamkorlarini mavhumlikda ushlab turgani ta'kidlanmoqda. Chunki, Britaniya rasman tashkilotdan chiqish jarayonini boshlagani yo‘q. Aslida, Tereza Mey buni 2017 yil mart oyi so‘nggidan avvalroq boshlashni rejalashtirmayapti. Uning so‘zlariga ko‘ra, birgalikda ishlash Britaniya va YeI manfaatlariga mos keladi. 

Fransua Olland esa, YeI birgina Britaniya uchun o‘z qadriyatlarini poymol qilishni istamasligini uqdirgan. 

«Men buni jiddiy aytdim: agar Tereza Mey xonim «qattiq» Brexit bo‘lishini xohlayotgan bo‘lsa, muzokaralar ham «qattiq» bo‘ladi», — degan fransuz davlat rahbari. 

Germaniya kansleri Angela Merkelning qayd etishicha, amalda Britaniyaning YeI tarkibidan chiqishi murakkab bo‘ladi va qimmatga tushadi.

Avvalroq, Yevropa kengashi raisi Donald Tusk, Brexit bo‘yicha «yengil» muzokaralarning imkoni yo‘qligini aytgan edi.