Meksikada jinoyatchilar qishloqni bosib olib, uni bir necha soat davomida talagan

Meksikaning Idalgo shtatida bir guruh jinoyatchilar bir qishloqni talash maqsadida bir necha soat nazorat ostida ushlab turdi.

Excelsior portali ma'lumotlariga ko‘ra, niqobdagi taxminan 20 nafar jinoyatchi 19 oktabrda kunduzi San-Xuaniko qishlog‘iga bostirib kirgan. Ular havoga o‘q uzishgan, bundan cho‘chib ketgan aholi yashirinib olgan yoki qochib ketgan. Biroq bir necha kishi bosqinchilarni o‘z telefonlariga yozib olishga muvaffaq bo‘lgan.

So‘ngra jinoyatchilar bir necha soat davomida qishloqdagi uylarni talagan, yirik shoxli chorvani haydab ketgan. Bosqinchilar qishloqni tashqi dunyo bilan uzib qo‘yish maqsadida kishloqdagi ko‘prikni vayron qilgan.

Jinoyat haqida qishloq aholisi ma'lum qilgandan keyingina xabar topildi. Jinoyatning sodir etilishiga shtatdagi turli aholi punktlarida yashovchi chorvachilar o‘rtasidagi nizo sabab bo‘lgan bo‘lishi mumkinligi aytilgan.