Qatar terma jamoasi bosh murabbiyi federatsiyaga shart qo‘ydi

JCh-2018 saralashida O‘zbekiston terma jamoasi bilan A guruhidan joy olgan Qatar terma jamoasi bosh murabbiyi Xorxe Fossati ma'lum qildiki, agar Qatar futbol federatsiyasi (QFA) milliy terma jamoaga xorijiy futbolchilarni naturallashtirishga taqiq qo‘llasa, o‘z lavozimini tark etadi.

Undan oldinroq QFA mahalliy futbolchilar manfaatlari uchun xorijlik futbolchilarni terma jamoaga jalb etishni to‘xtatish varianti ko‘rib chiqilishi haqida ma'lum qilgandi.

«Men futbolchilarni naturallashtirishni bas qilish rejasi haqida eshitdim. Men bunga mutlaqo qarshiman. Agar federatsiya shu yo‘nalishdan ketishni istasa, men ularning qarorini hurmat qilgan holda Qatar terma jamoasiga yangi bosh murabbiy izlashni taklif qilaman», — deya Fossatining so‘zlarini keltirgan L’Equipe.

JCh-2018 saralashi doirasida Xitoyga qarshi kechgan o‘yinda Qatar terma jamoasi safida naturallashtirilgan 6 nafar futbolchi ishtirok etdi.

Qatar terma jamoasi ayni vaqtda guruhdagi 6 terma jamoa ichida 5-o‘rinni egallab turibdi.

Qayd etish kerakki, bu davlatda 2022 yilgi jahon chempionati o‘tkazilishi belgilangan.