Qatarda harbiy vertolyot halokati: yetti kishi vafot etdi

Qatar harbiy-havo kuchlari vertolyotining mamlakat hududiy suvlari ustida parvoz paytida halokatga uchrashi oqibatida yetti kishi halok bo‘ldi. Bu haqda 22 mart, yakshanba kuni Qatar ichki ishlar vazirligi ma’lum qildi.

Bundan oldin bortda bo‘lgan olti kishining jasadlari topilgani, yana bir kishi — vertolyotning ikkinchi uchuvchisi bedarak yo‘qolganlar qatorida ekani xabar qilingan edi.

Dohadagi hukumat vertolyot texnik nosozlik sabab halokatga uchraganini bildirdi. Qatar mudofaa vazirligi esa bundan avval hodisa rejali topshiriqni bajarish chog‘ida sodir bo‘lganini ma’lum qilgan edi. Hokimiyat vertolyot turi va ekipaj missiyasining xususiyati haqida batafsil ma’lumot bermadi.

Qatar hokimiyati ma’lumotiga ko‘ra, halok bo‘lganlarning to‘rt nafari Qatar harbiy xizmatchilari, qolgan uch nafari esa Turkiya fuqarolari bo‘lgan.

Anqarada aniqlik kiritilishicha, halokatga uchragan vertolyot bortida bir nafar turk harbiysi va Aselsan harbiy-sanoat korporatsiyasining ikki nafar texnik mutaxassisi bo‘lgan.

Qatar, Fors ko‘rfazidagi boshqa davlatlar kabi, Isroil va AQShning Islom Respublikasiga qarshi urushi boshlanganidan beri Eron hujumlariga bir necha bor duch kelgan. Biroq hozircha vertolyot halokatining harbiy harakatlar bilan ehtimoliy bog‘liqligi haqida xabar berilmagan.

AQSh va Isroil 28 fevraldan buyon Eronga aviatsiya zarbalarini bermoqda. Bu hujumlar natijasida Eron oliy rahbari Ali Xominaiy va bir qator yuqori lavozimli amaldorlar hamda kuch ishlatar tuzilmalar vakillari halok bo‘lgan.

Eron esa javob tariqasida Fors ko‘rfazi mintaqasidagi qo‘shni davlatlarga raketa va dronlar yordamida hujum qilmoqda. Islom Respublikasi bayonotlariga ko‘ra, bu hujumlardan maqsad mintaqadagi Amerika harbiy bazalari hisoblanadi.

Eron zarbalari ostida Fors ko‘rfazidagi bir qator mamlakatlardagi neft omborlari va neft tankerlari ham qolgan. Bundan tashqari, urush boshlanganidan beri Eron hujumlaridan Ozarboyjon va Yevropa Ittifoqiga vaqtincha raislik qilayotgan Kipr ham jabr ko‘rgan.