Tennischining otasi u ishtirokidagi final vaqtida vafot etdi

Chililik ayol tennischi Daniela Segelning otasi qizining Xalqaro tennis federatsiyasi musobaqasining finalidagi uchrashuvi vaqtida vafot etdi. Musobaqa Chili poytaxti Santyagoda bo‘lib o‘tgan.

Sport.es portali ma'lumotlariga ko‘ra, chililikning braziliyalik Paula Gonsalvesga qarshi final uchrashuvida hisob Segelning foydasiga 6:4, 2:1 bo‘layotganda uning tribunadagi otasi o‘zini yomon his qila boshlagan. Erkak yaqin oradagi shifoxonaga tezda yetkazilganiga qaramasdan, hayotdan ko‘z yumgan. 

Uchrashuv hakami sportchini uchrashuvni davom ettirishga chaqirgan, biroq hisob 4:4 bo‘layotganda tennischi otasi ahvolidan tashvishga tushib kortni tark etgan. Oqibatda g‘alaba uning raqibiga berilgan.