Xitoy yana bir sohada AQShdan o‘zib ketdi

Xitoyda kinoteatrlar soni 40,9 mingdan oshib ketdi. Bu haqda Xitoy matbuot, radioeshittirish, kinematografiya va televideniye ishlari bosh boshqarmasida ma'lum qilindi. Xitoyda shu tariqa bu reytingda 40 759 kinoteatr bilan yetakchilik qilayotgan AQShdan 158 taga ko‘proq kinoteatr bor bo‘lib chiqdi.

Rasmiy statistikaga ko‘ra, Xitoyda oxirgi yilda kuniga 26 ta yangi kinozal paydo bo‘lgan, ya'ni bu 2015 yildagidan o‘rtacha 18 foizga ko‘proqni tashkil qilgan. Mahalliy sharhlovchilarning ta'kidlashicha, bu holat Xitoy aholisi moddiy farovonligi uzluksiz oshayotgani hamda Xitoyda iste'molchilik jamiyati shakllanayotgani bilan tushuntirilmoqda.

Filmlarning 3D-versiyalarini ko‘rish uchun mo‘ljallangan kinoteatrlar soni ham oshmoqda, ularga Xitoydagi kinoprokat muassasalarining umumiy sonining 85 foizi to‘g‘ri keladi. Xitoyning zamonaviy tomoshabinida Gollivudning yangi filmlari, ko‘plab Janubiy Koreya filmlari katta qiziqish uyg‘otadi.

Xitoyning matbuot, radioeshittirish, kinematografiya va televideniye ishlari bo‘yicha bosh boshqarmasi vakilining aytishicha, 12-besh yillik boshlangandan beri bozorning bu segmenti katta investitsiyalar jalb qilgan holda juda jadal sur'atlar bilan rivojlanmoqda.

"Ehtimol, bu oxirgi vaqtda sarmoya kiritishning eng istiqbolli yo‘nalishilaridan biri bo‘lsa kerak", deb aytdi amaldor.

Mavjud ma'lumotlarga ko‘ra, Xitoyda keng omma uchun kino namoyish qilishni birinchi bo‘lib 1896 yilda Shanxayda yashagan fransiyalik tadbirkor yo‘lga qo‘ygan.