AQSh va Eron yana zarbalar almashdi. Eronda 3 kishi halok bo‘ldi

Zarbalar shahar aholisining bir qismini elektrsiz qoldirganidan so‘ng, Chobahorning aksar hududlarida elektr ta’minoti qayta tiklangan. Shuningdek, Chobahordagi dengiz qatnovini nazorat qilish minorasi ham nishonga olingan.

Eron davlat matbuotining xabar berishicha, mamlakat janubi-sharqidagi Eronshahr shahri aeroportiga berilgan zarba oqibatida bir o‘t o‘chiruvchi halok bo‘lgan.

Bundan tashqari, AQSh zarbalaridan biri Eron shimolidagi Oqqal’a shahri yaqinida – temiryo‘l ko‘prigiga kelib tushgan.

Eron ham javob qaytardi

Eronning oliy xavfsizlik organiga aloqador bo‘lgan Nournews axborot agentligi harbiy manbaga tayanib, Tehron yaqin orada mintaqadagi AQSh bazalariga «keng ko‘lamli hujum» uyushtirishi haqida xabar berdi. Ushbu tahdid Oliy rahbar Mujtaba Xominaiyning katta maslahatchisi tomonidan ham takrorlandi.

Eron Islom inqilobi muhofizlari korpusi payshanba erta tongda – tungi zarbalarga javoban Kuvayt va Bahrayndagi AQSh bazalarining har biriga ikkitadan hujum uyushtirganini ma’lum qildi.

Agar AQSh o‘z hujumlarini takrorlasa, ularning javob choralari Fors ko‘rfazi mintaqasidagi boshqa bazalarga ham kengayishi aytilgan.

Eron davlat televideniyesi harbiylar Qatardagi sun’iy yo‘ldosh antennasini nishonga olgan holda dronlar orqali hujum uyushtirgani haqida xabar berdi.

Shuningdek, xabarda Quvayt va Bahrayndagi aniq nishonlar bo‘yicha tafsilotlar ochiqlangan. Unga ko‘ra, Quvaytda zarbalar «Patriot» raketaga qarshi mudofaa tizimlariga qaratilgan. Bahraynda esa hujum AQSh armiyasining yoqilg‘i omborini nishonga olgan.

Hujumlar oqibatida ko‘rilgan talafot yoki qurbonlar bor-yo‘qligi hozircha noma’lum.

Eron parlamenti spikeri Muhammad Boqir G‘olibof yesa Ho‘rmuz bo‘g‘ozi AQSh tahdidlari bilan emas, balki faqatgina «Eron tartib-qoidalari» asosida ochilishini aytdi.

U, shuningdek, AQSh «zo‘ravonlik qilish va o‘z majburiyatlarini buzish endi jazosiz (badalsiz) qolmasligini» hali ham anglab yetmaganini ta’kidladi.

So‘nggi keskinlashuv 17 iyun kuni imzolangan o‘zaro anglashuv memorandumini urushni yakunlash bo‘yicha doimiy bitimga aylantirish umidlariga putur yetkazmoqda.

Chorshanbaga o‘tar kechasi va tongda ham AQSh va Eron zarbalar almashgandi. Keyinroq, Anqaradagi sammitda prezident Tramp Eron bilan urushni tugatish bo‘yicha erishilgan muvaqqat kelishuv «tugagani», ular bilan ishlamasligini aytgandi.