Yaponiyaning Honda Motor Co avtomobil korporatsiyasi Google Inc kompaniyasi bo‘linmalaridan biri bilan haydovchisiz avtomobillar yaratish bo‘yicha hamkorlik borasidagi muzokaralar boshlanganini ma'lum qildi. Gap Honda Motor mashinalarida Google tarkibiga kiruvchi Waymo firmasi mutaxassislari tomonidan ishlab chiqilgan avtomatik boshqaruv texnologiyasini qo‘llash haqida ketmoqda.
Xabar qilinishicha, bu yangilik o‘zaro hamkorlikdagi ishlanmalarda foydalaniladi. Yangi turdagi avtomobillar ishlab chiqarish esa nazarda tutilmagan.
Honda Motor haydovchisiz boshqariladigan mashinalar yaratish sohasida tobora kuchayib borayotgan raqobatda oldingi o‘rinlarga chiqib olish niyatida.
Kelishuv amalga oshadigan bo‘lsa, Honda avtomobillari Waymo tomonidan AQShning turli hudularida sinovdan o‘tkazilayotgan haydovchisiz mashinalar safini to‘ldiradi. Yaponiya korporatsiyasi 2020 yilda tezkor yo‘llarda haydovchisiz harakatlana oluvchi avtomobillarni taqdim etish niyatida.
Waymo esa Fiat Chrysler korporatsiyasi bilan hamkorlik borasida bitimga erishib bo‘lgan.
