Xitoy atmosfera tarkibidagi uglerod ikki oksidi miqdorini kuzatib turuvchi TanSat sun'iy yo‘ldoshini fazoga uchirdi. U mamlakat shimoli-g‘arbidagi Gobi sahrosida barpo qilingan Tszyutsyuan kosmodromidan havoga ko‘tarilgan. "Sinxua" agentligining xabar qilishicha, sun'iy yo‘ldosh "Chanchjen-2-Di" (Long March-2D) raketa tashuvchisi vositasida fazoga olib chiqilgan.
Vazni 620 kg keladigan TanSat 700 km balandlikdagi quyoshga sinxron orbitaga olib chiqilgan. U Yer atmosferasida uglerod ikki oksidi to‘planishi va miqdoriga oid ma'lumotlarni Yerga uzatish vazifasini bajaradi. Qurilmaning bosh konstruktori In Tszenshanning so‘zlariga ko‘ra, qurilma iqlim o‘zgarishlarini o‘rganishga imkon beradi. U 3 yil muddat davomida ishlashga mo‘ljallangan.
Xuddi shunday raketa tashuvchi yordamida yana uchta mitti sun'iy yo‘ldosh orbitaga chiqarilgan, deb xabar qilmoqda "Sinxua" agentligi. Ular Xitoy xalq xo‘jaligi maqsadlariga xizmat qiladi.