Venger O‘zilni himoya qildi

«Arsenal» jamoasi bosh murabbiyi Arsen Venger jamoa yarim himoyachisi Mesut O‘zilni uni tanqid qilayotgan muxlislardan himoya qildi.

APLning 17-turida «Manchester Siti»ga qarshi kechgan va 1:2 hisobidagi mag‘lubiyat bilan yakunlangan o‘yindan keyin muxlislar ushbu germaniyalik futbolchini o‘yinda bor kuchi bilan harakat qilmaganlikda ayblagandi.

«Men tanqidlarga e'tibor qaratmayman. Odamlar o‘yinni tahlil qilishadi, o‘z fikrlarini bildirishadi va ular bunga haqli. Bu normal holat. Biz ham bu fikrlarga o‘z munosabatimizni bildirishimiz mumkin. Men O‘zilga maydonda istaganingcha o‘yna demaganman. 

Qachonki, jamoa to‘psiz bo‘lganida u boshqalar qilayotgan ishni qiladi, ya'ni to‘pni olib qo‘yish uchun pressingda ishtirok etadi. Mesut – maydonda chin dildan mehnat qiladigan futbolchi. O‘yinda muvaffaqiyatsiz harakatlardan qochib qutulib bo‘lmaydi. Ammo men aytishim mumkinki, u o‘z ishini yaxshi bajaradi», — deya Vengerning so‘zlarini keltirgan Sky Sports.

Joriy mavsumda Mesut O‘zil APL doirasidagi 16 uchrashuvda maydonga tushib, 5 gol urdi va 2 golga uzatma berdi.

Quyidagi videodan jamoa muxlislari nega xafa bo‘lishganini tushunish mumkin. Bu videoda O‘zil raqib to‘p bilan muomila qilayotganida o‘z oldidan bir necha marta o‘tgan to‘pni olib qo‘yish uchun intilmagani ko‘rinadi.