Tadqiqot: Dunyo okeani sathi halokatli darajada ko‘tarilishi mumkin

Amerika va Irlandiya olimlari Dunyo okeani sathining halokatli tarzda ko‘tarilishi ehtimolini rad etishmagan. Bunday fojiali tabiat hodisasi geologiya nuqtai nazaridan yaqin kelajakda, aniqrog‘i, bir necha yuz yil yoki ming yillarda yuz berishi mumkin. Ushbu mavzuga doir tadqiqot natijasi Science jurnalida chop etilgan. 

Olimlar, 116-129 ming yillar avval, ikki muz davri o‘rtasidagi davrda Dunyo okeani yuzasining harorati hozirgi davr ko‘rsatkichi bilan deyarli bir xil bo‘lganini namoyish etishdi. Shu bilan birga, o‘sha vaqtda, mutaxassislarning so‘zlariga ko‘ra, suv sathi hozirgidan 6-9 metr baland bo‘lgan. 

Ma'lum bo‘lishicha, muz davri boshlanishining ilk bosqichlarida, ya'ni taxminan 129 ming yillar avval, Dunyo okeanining sathi 1870-1889 yillardagi ko‘rsatkichlarga mos kelgan.

Shundan so‘ng, 125 ming yillar ilgari, dengiz suv yuzasining harorati Tselsiy shkalasi bo‘yicha 0,5 darajaga ko‘tarilgan va hozirgi zamon darajasiga tenglashgan. 

Olimlar, Dunyo okeanining muz davrlari oralig‘idagi harorati va sathiga oid ma'lumotlarni hozirgi ko‘rsatkichlar bilan qiyoslagan holda o‘z xulosalarini taqdim etishgan. Mutaxassislarning qayd etishicha, ushbu tadqiqot global iqlim isishining dengizlarga qanday ta'sir ko‘rsatishini o‘rganishda yordam beradi.