Tojik-afg‘on chegarasida 10 mingdan ortiq jangari to‘plangani ma'lum bo‘ldi

Tojikiston ichki ishlar vaziri ma'lumotlariga ko‘ra, Afg‘onistonning Tojikiston bilan chegaraga yaqin hududida 10 ming jangari bir joyga to‘plangan.

Mamlakat ichki ishlar vaziri Ramazon Rahimzoda jurnalistlarning Afg‘oniston tomondagi tojik-afg‘on chegarasida hozir qancha jangari bo‘lishi mumkinligi haqidagi savolga – taxminan 10-15 ming, deb javob qaytargan.

«Biz aniq raqamlarni keltira olmaymiz, biroq ularning soni 10-15 ming kishi atrofida bo‘lishi mumkin. Afg‘onistondagi vaziyat murakkabligicha qolmoqda. Bu barchani tashvishga solayotgani hech kimga sir emas», - deya ta'kidlab o‘tdi IIV rahbari.

Shu bilan bir qatorda, uning qo‘shimcha qilishicha, Afg‘onistonda Tojikistonning turli terrorchilik tashkilotlari safiga kirgan fuqarolari ham bor. «Biroq u yerda faqatgina Tojikiston fuqarolari emas, balki ko‘plab mamlakatlardan kelgan kishilar bor. Afg‘oniston huquqni muhofaza qilish organlari xodimlari u yerda kechayu kunduz ishlar olib bormoqda, ammo vaziyat juda og‘ir», - dedi vazir.

U Tojikiston tomoni chegarani to‘liq nazorat ostida ushlab turganini aytib o‘tgan.