Mehmonxonadan san'at asarini o‘g‘irlagan tailandlik amaldor iste'foga chiqdi

Tailand Savdo vazirligi rahbari o‘rinbosari 60 yoshli Supxat Sakvandikul Kioto mehmonxonasi (Yaponiya) kameralari uning qimmatbaho san'at asarini o‘g‘irlaganini qayd etganidan keyin iste'foga chiqish uchun ariza topshirdi. Iste'foga chiqqan amaldor o‘g‘irlikni sarhush holatda sodir etganini tan oldi. The Star shu haqida xabar berdi. 

Yaponiyadagi mehmonxona xodimlari taxminiy qiymati 125 dollarga baholangan rasmning yo‘qolgani haqida 2017 yilning yanvarida ma'lum qilgan edi. Politsiya kuzatuv kameralarini tekshirdi va Sakvandikulning jinoyat sodir etganini aniqladi. U Yaponiyaga Tailand hukumati topshirig‘i bilan borgandi. Amaldor qo‘lga olindi va o‘g‘irlikda ayblandi. U o‘z aybiga iqror bo‘ldi va yetkazilgan zarar uchun mehmonxonaga kompensatsiya to‘ladi. 

"Yaponiyadagi ishlarimni tugallaganidan keyin universitetdagi do‘stlarim bilan uchrashdim. Biz sarhush holatda edik, men o‘zim anglamagan holatda nomaqbul harakatni amalga oshirdim. Bundan juda pushaymonman", - dedi Supxat Sakvandikul.

Savdo vazirligi vakillari sud ishi davomida Sakvandikulni idoradagi boshqa lavozimga o‘tkazishlari haqida ma'lum qilishdi. Bunday bayonot mamlakat aholisi orasida katta muhokamaga sabab bo‘ldi - ular hukumatni aybdor amaldorlarni ishdan bo‘shatmaslikda ayblashdi.