Filippindagi zavodlardan birida yuz bergan yong‘in oqibatida 100dan ortiq inson jabrlandi

Filippin poytaxti Maniladan janubda joylashgan yirik zavodda yong‘in yuz berishi oqibatida yuzdan ortiq ishchi jabrlangan, yana 3 kishi bedarak yo‘qolgan hisoblanmoqda. Bu haqda Associated Press xabar qilgan.

Ma'lumotlarga ko‘ra, yong‘in House Technology Industries kompaniyasi zavodining 3 qavatli binosida ro‘y bergan. O‘t o‘chiruvchilar 18 soatdan so‘ng, vaziyatni nazoratiga olishgan. Shunga qaramay, bu vaqtga kelib yong‘in to‘liq bartaraf etilmagan. 

Kavite viloyati ma'muriyati vakili Xesus Krispin Remullning aytishicha, zavod xodimlari o‘t balosidan qutilish uchun derazalardan sakrashgan. Hodisa oqibatida 3 nafar yaponiyalik jarohat olgan, juda og‘ir ahvoldagi 10 kishiga shifoxonada tibbiy muolaja ko‘rsatilmoqda. Umuman, fojia vaqtida zavodda 5 mingga yaqin kishi bo‘lgan.