Andijonda yangi g‘oya va ixtirolar yarmarkasi bo‘lib o‘tdi

Andijon davlat tibbiyot institutida “Innovatsion loyihalar, texnologiyalar va g‘oyalar” X – Respublika yarmarkasining bosqichi bo‘lib o‘tdi.

“Yangi g‘oyamiz – semizlik va ortiqcha vazndan aziyat chekayotgan kishilar uchun yaratilgan bo‘lib, avtomobillar xavfsizlik kamari uchun maxsus fiziologik qurilma, bu esa loyihamizga berilgan mualliflik patenti”, - deydi Andijon tibbiyot institutining talabasi Javohir Soliyev. Qarangki, uskuna oddiy avtomobildagi xavfsizlik kamariga moslangan ekan.

“Mashina minib ketaverasiz, qurilma past chastotali magnitoterapiya va vibroterapiya muolajasini bajarib, badandagi ortiqcha yog‘ to‘qimalarini parchalab boraveradi”, - deydi talaba.

Tibbbiyot oliygohining bir guruh xodimlari tomonidan ishlab chiqilgan yana bir g‘oya - homila po‘stlog‘i barvaqt uzilganda homiladorlikni prognozlash usuli e'tiborni tortdi.

Andijon davlat tibbiyot institutidagi tadbirda ko‘plab ana shunday ixtirolar namoyish qilindi. Tadbirda so‘z olgan viloyat hokimi o‘rinbosari Manzuraxon Yunusova yarmarkada ishtirok etgan barcha izlanuvchan soha egalariga o‘z minnatdorchiligini bildirib, kelgusi ishlariga muvaffaqiyatlar tiladi.