Tramp Oq uy jurnalistlari bilan an'anaviy uchrashuvdan bosh tortdi

AQSh prezidenti Donald Tramp Oq uy huzuridagi muxbirlar uyushmasining (WHCA) har yili o‘tkaziladigan an'anaviy tantanali kechki ovqatini o‘tkazib yuboradi.   

"Men bu yilgi WHCA kechki ovqatida ishtirok etmayman", deb yozdi Tramp tvitterda va uchrashuv ishtirokchilariga kechani yaxshi o‘tkazishni tilab qoldi.

WHCA’ning an'anaviy kechki ovqatida odatda jurnalistlar, mashhur kishilar va siyosatchilar, jumladan AQSh prezidenti uchrashadilar. Joriy yilgi tadbir 29 aprelda Vashingtonda o‘tkazilishi rejalashtirilgan.   

WHCA 1914 yilda tashkil etilgan bo‘lib, jurnalistlarning mustaqil birlashmasi hisoblanadi. Avvalroq uyushma AQSh ma'muriyati matbuot xizmatining yopiq matbuot-anjumanga bir qator OAV vakillarini qo‘ymaslik qarorini tanqid qilib chiqqandi.