Krasnodarda moskvalik radikal muxlislar slavyan bo‘lmagan mahalliy kishilarga hujum qilishdi

Rossiya chempionati 18-turi doirasida Krasnodar shahrida bo‘lib o‘tadigan «Krasnodar» — «Spartak» uchrashuvi oldidan mehmon jamoa muxlislari tartibsizliklarni keltirib chiqarishdi.

«Tupodar» portalida yozilishicha, moskvalik muxlislar shaharda sayr qilib yurgan kishilarga hujum qilishgan. Ular slavyan bo‘lmagan kishilarni nishonga olishgan.

«Moskvalik muxlislar huquq-tartibot organlari xodimlari bilan mushtlashuvga kirishdi. Fanatlar politsiyachilarga qarshi pirotexnik vositalar qo‘llashdi. Politsiya esa ularga qarshi dubinkalar va ko‘zdan yosh sizdiruvchi gaz qo‘llashga majbur bo‘lgan», deyiladi «Rossiyskiy dialog» xabarida.

Shu bilan birga «Spartak» jamoasining «Ultra Sever» fan klubi rahbari ijtimoiy tarmoqlar orqali tartibsizliklarni Krasnodar politsiyasi boshlagani haqida yozgan.

«Krasnodar» - «Spartak» uchrashuvi bugun, 5 mart kuni mahalliy vaqt bilan soat 16:30da boshlanishi belgilangan.