Uber taksi va ikki yog‘och stul o‘rtasida qanday bog‘liqlik bo‘lishi mumkin?

Qozog‘istonda olmaotalik qiz Uber taksiga buyurtma berganidan so‘ng o‘rindiqlar o‘rniga yog‘och stullar qo‘yilgan mikroavtobus keldi. Bu haqida Tengrinews xabar berdi. 

Buyurtmachining so‘zlariga ko‘ra, u 6 mart kuni ilova orqali mashina chaqirtirgan.

"Biz onam bilan salonga kirib, u yerda turgan yog‘och stullarni ko‘rib juda ajablandik - haydovchi bizni shu stullarga o‘tirishga taklif etdi. Biz kula boshladik. U yerda haqiqatda ikki yog‘och stul turgandi", - deydi qiz.

Qiz buning aqlga sig‘masligi, axir Uber'ning o‘z standartlari va avtomobillarga bo‘lgan talablari mavjudligiga ishora qildi. 

"Men shoshilayotgandim, shuning uchun qayta buyurtma bermadim", - deydi u. 

Uber ma'muriyati bu voqeadan taajjubga tushgani bildirib, haydovchiga nisbatan chora ko‘rilganini ta'kidladi. 

Tengrinews ma'lumotlariga ko‘ra, stulli mashina haydovchisining reytingi 5 (maksimal) bal bo‘lgan.