BMW’ning Britaniyadagi ishchilari 20 yil ichida birinchi marta ish tashlashdi

BMW nemis avtomobilsozlik kompaniyasining Buyuk Britaniyadagi ishchilari 20 yil ichida birinchi marta ish tashlash aksiyasini uyushtirdilar. "Interfaks" axborot agentligining ma'lum qilishicha, kompaniyaning Kouli, Xems-Xoll va Suindondagi MINI mashinalari va butlovchi qismlar ishlab chiqaruvchi 3 ta korxonasida ishlar to‘xtatildi.

Norozilik pensiya miqdorining qisqartirilishi sababli bildirilgan. Unite kasaba uyushmasida 8 ta 24 soatlik ish tashlash aksiyasi ko‘zda tutilgani ma'lum qilindi. Keyingi norozilik aksiyasi 23 aprelda o‘tkaziladi.

Kasaba uyushmasi xabarida "BMW xo‘jayinlari boshlarini qumdan chiqarib, ularning pensiyalarni qisqartirish rejalari itoatkorona qabul qilinmasligini anglashlari kerakligi" aytilgan. Taxmin qilinishicha, may oyida norozilarga Rolls-Royce’ning Gudvuddagi xodimlari ham qo‘shilishadi.

Kompaniya rahbariyati kasaba uyushma vakillarini muzokaralar stoliga qaytishga chorladi. Kompaniyada ta'kidlanishicha, Koulidagi zavod kuniga mingtaga yaqin MINI mashinasi ishlab chiqaradi. Korxona yo‘qotishlarni yil davomida to‘ldirib olishga umid qilmoqda.