Frantsuz 5 metrlik bilyard tayoqchasi bilan rekord o‘rnatdi

Fransiyalik bilyard ustasi Florian Koler 5 metrdan uzunroq keladigan bilyard tayoqchasi (kiy) bilan Ginness rekordlar kitobidan joy oldi. Bu haqda UPI nashri xabar bermoqda. 

Sportchi AQShning Las-Vegas shahridagi tadbirda uzunligi 537 sm keladigan bilyard tayoqchani namoyish qildi. Bu tayoqchani uning homiysi MEZZ yapon firmasi tayyorlagan. Bilyardchi bu antiqa tayoqcha bilan 8 ta sharni luzaga tushira oldi.     

Ginness rekordlar kitobi vakillari ushbu tayoqchani o‘ynash uchun yaroqli bo‘lgan dunyodagi eng uzun bilyard tayoqchasi deb tan oldilar. Standart bilyard tayoqchasining uzunligi 160 sm dan oshmaydi.

Tadbirda Koler bilyard bilan bog‘liq yana 5 ta jahon rekordini o‘rnatgan. Ginness rekordlar kitobiga ko‘ra, u bir daqiqa ichida o‘rtadagi luzaga sharlardan tuzilgan to‘siq ustidan o‘tkazib 70 ta sharni tushira olgan va sharga zarba berganidan keyin uning 23,53 soniya davomida aylanib turishiga erisha olgan.