O‘zbekistonda YeI bilan hamkorlikda Savdo va investitsiya bo‘yicha Kengash tashkil etilishi mumkin

2017 yil 4 may kuni Yevropa Ittifoqining O‘zbekistondagi idorasida OAV vakillari ishtirokida press-konferensiya tashkil etildi. Tadbirda YeI O‘zbekistondagi elchisi Eduards Stiprays o‘zining bayonoti bilan ishtirok etdi.

Ayni damda YeI O‘zbekiston bilan Savdo va investitsiya bo‘yicha Kengash tashkil etish masalasini ko‘rib chiqmoqda. Mazkur kengashda nafaqat davlatning rasmiy vakilllari, balki o‘zaro hamkorlik aloqalarini o‘rnatish istagida bo‘lgan O‘zbekistonlik tadbirkorlar hamda yevropa firmalari va kompaniyalari ham bevosita ishtirok etish imkoniga ega bo‘ladi. 

Shuningdek, Yevropa Ittifoqi O‘zbekistonda ishlab chiqarilayotgan tayyor mahsulotlarni Yevropa bozoriga to‘siqlarsiz kirib borishini ta'minlash maqsadida eksport sohasini ham qo‘llab-quvvatlamoqda. Jumladan, 2016 yilda Yevropa Parlamenti "to‘qimachilik protokoli" deb ataluvchi hamkorlik va sheriklik to‘g‘risidagi bitimni tasdiqladi. Mazkur hujjat YeIga olib kiriladigan o‘zbek paxtasi va to‘qimachilik mahsulotlari uchun bojxona majburiyatlarini kamaytiradi. 

Bundan tashqari, mahalliy ishlab chiqaruvchilarga YeI mamlakatlarida o‘z mahsulotlarini erkin savdo qilishlariga imkon beradi.