Fransiyaning eng badavlat odami Makronni qo‘llab-quvvatlamoqda

Fransiyaning eng badavlat odami, LVMH konglomerati bosh direktori Bernar Arno prezidentlik saylovlarida "Olg‘a" harakati yetakchisi Emmanuel Makronni qo‘llab-quvvatlamoqda. Bu haqda Business of Fashion nashri xabar bermoqda. 

"Shubhasiz, men Emmanuel Makronga ovoz beraman", deb aytdi Arno. U, shuningdek, Makronning saylovlar bo‘yicha raqibi, "Milliy front" yetakchisi Marin Le Penning saylov kampaniyasini tanqid qildi. 

Milliarderning aytishicha, Le Penning iqtisodiy dasturi Fransiyaga "tuzatib bo‘lmas tanazzul" bilan xavf solmoqda.  

Avvalroq bu haftada yana 12 ta kompaniya yetakchisi Le Penga qarshi chiqib, uning siyosati Fransiyaga ziyon yetkazishini aytgandilar. Bungacha ko‘pchilik top-menejyerlar saylov bo‘yicha o‘z fikrlarini bildirmay kelayotgandilar.