O‘zbekiston madaniy merosiga bag‘ishlangan xalqaro kongress boshlandi

15-16 may kunlari Toshkent va Samarqand shaharlarida "O‘zbekistonning madaniy merosi - xalqlar va davlatlar o‘rtasidagi muloqotga yo‘l" mavzuida xalqaro ilmiy-madaniy kongress bo‘lib o‘tmoqda.

Kongressda dunyoning 40dan ortiq mamlakatidan 140 nafar xorijiy ekspertlar, diplomatlar, olimlar, xalqaro tashkilot vakillari ishtirok etishmoqda. Shuningdek, unda O‘zbekistonning 50dan ortiq ilm-fan namoyandalari hamda milliy va xorijlik OAV xodimlari qatnashmoqda.

Tadbirdan ko‘zlangan asosiy maqsad - O‘zbekiston madaniy-tarixiy merosini o‘rganish, asrab-avaylashdir.

Kongressning birinchi kuni EOAVMA media-zalida bo‘lib o‘tdi. Tadbirda "O‘zbekiston madaniy merosi dunyo to‘plarida" loyihasining taqdimoti o‘tkazildi. Taqdimotda O‘zbekiston Fanlar akademiyasining akademigi Edvard Rtveladze loyihaning ilmiy mazmuni haqida so‘zlab berdi.

Tadbir davomida xorijlik mehmonlar O‘zbekiston hududidan olib chiqib ketilgan va dunyoning turli mamlakatlari muzeylarida saqlanayotgan moddiy va badiiy madaniyatning noyob obektlariga bag‘ishlangan ma'ruzalar bilan chiqishdi.