Qashqadaryoda fermer xo‘jaligi yerlarini sotib yuborgan shaxs jazoga tortildi

Qamashi tumanidagi “Ochil o‘g‘li Eshboy” fermer xo‘jaligining 17 gektar yer maydoni boshqa fermerlarga berildi-yu, xo‘jalikda ish yurituvchi bo‘lib ishlagan O‘rol Pardayevning halovati buzildi. Albatta, bu bejiz emas edi...

“Huquq” gazetasining yozishicha, O‘.Pardayev xo‘jalikka ish yurituvchi bo‘lgach, e'tiborni xo‘jalikni rivojlantirishga emas, balki lavozimidan foydalanib, shaxsiy maqsadlari uchun daromad topishga qaratdi.

Xo‘jalik yerlari ancha unumdor, buning ustiga suvli yerlar hisoblanadi. Tabiiyki, bunday yerga talabgorlar ko‘p. Ayniqsa, ana shunday joydan tomorqa uchastkasi olishni xohlaydiganlar istagancha topiladi. O‘rol Pardayev buni bilib, turar joy va tomorqa uchun yer sotilayotgani haqida atayin qishloqda mish-mish tarqatdi. Ko‘p o‘tmay, fuqaro Qudrat Xolmurodov birinchi xaridorga aylandi. O‘.Pardayev o‘ylab o‘tirmasdan, unga bir gektar yerni 12 million so‘mga sotib yubordi. Q.Xolmurodov hujjat ishlari xususida so‘z ochganida, ish yurituvchi tuman hokimligida mansabdor tanishlarini borligini, ular orqali yerni hujjatlashtirib berishini bildirdi.

Q.Xolmurodov uning gapi bilan ajratilgan yer maydoniga hovli-joy qurdi. Hududni devor bilan o‘rab olib, dehqonchilik qila boshladi. Bu paytda O‘.Pardayev qolgan yerga xaridor izlash bilan band bo‘ldi.

Omondavlat Jonquvvatov ham bog‘dorchilik bilan shug‘ullanish maqsadida yer izlab yurgandi. O‘.Pardayev yer sotayotganligi xususida eshitib, 2016 yilning fevral oyida uning yoniga bordi. Maqsadini tushuntirib, yer so‘radi.

-  Harholda hamqishloqmiz, sizni aldamayman. Istagan joyingizdan yer ajratib beraman, - dedi O‘.Pardayev fermer xo‘jaligi yerlarini ko‘rsatib.

-  Narxi qancha bo‘ladi? – O.Jonquvvatov garchi narx-navo haqida odamlardan eshitgan bo‘lsa-da, aniqlashtirib olish maqsadida yana so‘rashdan erinmadi.

-  El qatori beraverasiz. Ya'ni gektari 12 million so‘m bo‘ladi. Hujjatlari masalasida ko‘nglingiz xotirjam bo‘lsin, ularni o‘zim rasmiylashtirib beraman.

O.Jonquvvatov rozi bo‘lib, pulini sal keyinroq berish sharti bilan ishni boshladi. Ish yurituvchi unga shudgorlangan yerdan bir gektar maydonni ajratib berdi. U esa bu yerga beda ekdi.

Ko‘p o‘tmay, ishlar teskarisiga aylanib ketdi. Fermer xo‘jaligi tugatilib, unga tegishli bo‘lgan yer maydoni tuman hokimligining zaxira yer fondi hisobiga o‘tkazildi. Aslida esa mazkur fermer xo‘jaligi sal avval tugatilgan bo‘lib, uning yer maydoni tuman hokimining 2015 yil 18 noyabrdagi qarori bilan “Dashtobod zarbdori” fermer xo‘jaligi ixtiyoriga o‘tkazilgandi. Endilikda ish yurituvchi sotgan yerlar ham yangi xo‘jalikka tegishli edi. O.Jonquvvatov buni bilgach, yerni sotib olishdan voz kechdi. O‘.Pardayevning paytavasiga qurt tushdi. Bir tomondan yaxshigina daromaddan ayrilganiga xunob bo‘lsa, boshqa tomondan sotib yuborilgan yerlar bilan bog‘liq yuzaga keladigan muammolar xavotirini oshirdi. Jim tursa boshiga g‘alvalar tushishi, jinoyati fosh bo‘lishi shubhasiz. Endi nima qilish kerak?

O‘rol Pardayev surishtirib, yerning yangi egasi “Dashtobod zarbdori” fermer xo‘jaligi rahbari Zafar Eshquvatov ekanligini aniqladi. Keyin Z.Eshquvatovga uchrashib, undan odamlarga sotgan yerlariga teginmasligini, ekin ekmasligini so‘radi. Ammo fermer bunday qila olmasligini, chunki yer maydoniga chigit ekish uchun shartnoma tuzib qo‘yganligini tushuntirdi.

-  Ogohlantirib qo‘yay, agar men sotgan yerga ekin ekadigan bo‘lsang, sening ham, otangning ham ustidan yozib, sharmandalaringni chiqaraman, - O‘.Pardayev tahdid qilib, uni fikridan qaytarishga urindi.

Z.Eshquvatov fermerlik nima ekanligini, o‘z haq-huquqlarini yaxshi bilardi. Shu sababli tahdidlarga parvo qilmay, yerni shudgorlab tashladi. O‘.Pardayev bo‘lsa “yaxshi gapga ko‘nmagan” fermerning ustidan turli idoralarga shikoyat xatlar yozishga tushdi. Yolg‘on va tuhmatlardan iborat murojaatlar tegishli idoralar tomonidan bir necha bor tekshirildi. Biroq O‘.Pardayev yozishdan to‘xtamadi.

-  Aytganimga ko‘nmasang, ustingdan yozaveraman. Yaxshisi sotgan yerlarimdan qo‘lingni tort. Ana shunda da'voim yo‘qligi to‘g‘risida ariza yozishim mumkin.

Z.Eshquvatov dag‘dag‘alardan cho‘chimay, ishlashda davom etdi. Bu orada yerni sotib olganlar o‘z roziligi bilan qaytarib berishdi. Ammo O‘.Pardayev otdan tushsa ham, egardan tushmay turaverdi. Shikoyat ustiga shikoyat yozib, odamlarning tinchini buzdi.

Har bir ishning oxiri bo‘ladi. Mazkur mojarolar sudga qadar yetib bordi. Shundan so‘ng O‘.Pardayevning aqli joyiga tushdi. Ammo endi kech bo‘lgandi.

Jinoyat ishlari bo‘yicha Chiroqchi tuman sudi tomonidan O‘rol Pardayevga qilmishi uchun eng kam oylik ish haqining 55 baravari miqdorida jarima va 5 yil muddatga ozodlikdan cheklash jazosi tayinlandi.