Mirziyoyev O‘zbekistondagi yo‘llar qanday bo‘lishi kerakligini aytdi

Avval xabar qilinganidek, Prezident Shavkat Mirziyoyev Andijon viloyati faollari bilan uchrashuv o‘tkazdi.

Unda Prezident yo‘llarimizning istiqboldagi ko‘rinishi haqida o‘z fikrlarini bildirdi, deb xabar bermoqda Kun.uz muxbiri.
 
Yo‘llarni iqtisodiyot qon tomiriga o‘xshatishadi. Bu bejiz emas. Keng va ravon, harakat va yuk tashish uchun qulay bo‘lgan yo‘llar iqtisodiyot rivojida muhim o‘rin tutadi.

Prezident Andijonda namuna sifatida keng, zamon talablariga mos yo‘llarning qanday bo‘lishi kerakligiga to‘xtaldi.

“Davlat byudjyetidan Andijon namunasi sifatida ikki chetiga daraxtlar ekilgan yo‘llar barpo etish uchun kerakli mablag‘lar yo‘naltiriladi. Yo‘llar shunday bo‘lsinki, yo‘lovchi charchamasin, manzaradan bahri-dili ochilsin. Men Andijonda mana shunday yo‘llarni ko‘rdim va ushbu tajribani butun mamlakat bo‘ylab joriy etish kerak, deb hisoblayman. Aholidan virtual qabulxonaga tushayotgan ko‘plab murojaatlar yo‘llarimizning holati haqidadir. Mana shuning o‘zi ham bugungi kunda yo‘l nazorati tizimini tashkil qilish davr talabi ekanini ko‘rsatmoqda”, - degan Mirziyoyev.