Ikki ruminiyalik konsert vaqtida 62 ta mobil telefon o‘g‘irladi

Ruminiyaning ikki fuqarosi Ispaniyadagi konsert vaqtida 2 soat ichida 62 ta mobil telefonni o‘g‘irlashga ulgurdi, deb xabar bermoqda Romania-Insider yangiliklar portali.

Jinoyatchilardan biri arenani konsert tugashigacha tark etmoqchi bo‘lgan, biroq uning xatti-harakatidan sergak tortgan politsiya tomondan ushlangan. Uning ryukzagida 41 ta telefon aniqlangan.

Bir necha daqiqadan keyin konsert majmuasidan chiqaverishda yana bir ruminiyalik yigit ushlangan, u tintuv qilinganda yonida 21 ta telefon borligi aniqlangan.

Gumonlanuvchilar hibsga olinganlar, politsiya esa telefonlar egalarini topib, ularga telefonlarini qaytarishga harakat qilmoqda.