Samarqand shahridagi «Inturist» mehmonxonasi buzilmoqda

Samarqand shahri markazidagi «Inturist» mehmonxonasining 11 qavatli binosi buzilishga topshirildi. Bu haqda STV telekanalida xabar berilgan.

Xabarda ta'kidlanishicha, mazkur bino 11 yildan buyon faoliyat yuritmagan va avariyaviy holda qolayotgandi.

Binoni buzish taklifi Samarqand viloyatiga uyushtirgan safari chog‘ida O‘zbekiston prezidenti tomonidan berilgan edi. Vazirlar Mahkamasi qarori bilan bir hafta oldin binoni buzish ishlari boshlangan.

Mehmonxona o‘rnida nima qurilishi haqida hozircha xabar yo‘q. Samarqand viloyat hokimiyati ma'lumotlariga ko‘ra, qurilish tashkilotlaridan turar joy binosi, favvorali bog‘, shuningdek, yangi mehmonxona qurish takliflari kelmoqda.