OAV: Rossiyaning sobiq matbuot vaziri Mixail Lesin o‘ldirilgan

Rossiyaning sobiq matbuot vaziri va mediamenejyer Mixail Lesin Vashingtondagi mehmonxonada baxtsiz hodisa tufayli halok bo‘lmagan, u o‘ldirilgan. Bu haqda BuzzFeed nashri AQShning razvedka va huquqni muhofaza qilish idoralarining bir necha amaldorlariga asosan xabar bermoqda.

Maqolada aytilishicha, Lesin AQSh adliya vazirligi bilan rejalashtirilgan uchrashuvdan avval o‘ldirilgan. Nashrning ta'kidlashicha, adliya vazirligi xodimlari Lesinning o‘limidan biroz avval uni o‘zi tashkil etgan RT telekanalidagi ish haqidagi intervyuga chaqirishgan.

Rossiya sobiq matbuot vaziri va «Gazprom-media» sobiq rahbari 2015 yilning noyabr oyida Vashington markazidagi Hotel Dupont mehmonxonasida hayotdan ko‘z yumgandi. Baxtsiz hodisa o‘limga sabab qilib ko‘rsatilgan, bu boradagi ish yopilgan. Lesin Rossiya matbuot vaziri lavozimini 1999-2004 yillar davomida egallagan.