Buyuk Britaniya Myanmadagi vaziyat tufayli BMT XKning favqulodda yig‘ilishini chaqirdi

Buyuk Britaniya Myanmaning Arakan viloyatidagi vaziyatni muhokama qilish uchun BMT Xavfsizlik Kengashining favqulodda yig‘ilishini chaqirdi, deb xabar bermoqda «Anadolu».

«Arakan muammosini muhokama qilish lozim, ular uzoq vaqt davomida yig‘ilib qolgan. Barcha tomonlarni vazminlikka chaqiramiz», - deya yozgan Buyuk Britaniyaning BMTdagi doimiy vakili Metyu Raykroft ijtimoiy tarmoqlarda.

Yig‘ilish 31 avgust kuniga rejalashtirilgan.

Kuni kecha BMT bosh kotibi Antoniu Guterrish Arakanda yuzlab rohiniya musulmonlarning o‘ldirilishidan tashvishda ekanini bildirdi.

Yevropa musulmon rohiniyalar kengashi matbuot kotibi Anita Shugning xabar berishicha, Myanmadagi Arakan shtatida qurolli kuchlar askarlari tomonidan uch kun ichida 2-3 ming musulmon o‘ldirilgan, 100 mingdan ortiq inson o‘z uyidan ko‘chirib yuborilgan.