Tramp dunyo mamlakatlari yetakchilari bilan BMT islohotini muhokama qilishni rejalashtirayapti

AQSh prezidenti Donald Tramp 18 sentabrda BMT bosh qarorgohida anjuman tashkil etib, jahon davlatlari rahbarlari bilan tashkilotni isloh qilishni muhokama qilmoqchi, deb xabar qilmoqda Reuters agentligi.

Qayd etilishicha, AQSh BMT bosh kotibi Antoniu Guterrishni «samarali va sezilarli islohotni» boshlashga undovchi 10 banddan iborat siyosiy bayonot hozirlagan. Mamlakatlar ushbu hujjatni imzolashsa, Tramp bilan yig‘ilishda ishtirok eta olishadi. 

«Biz bosh kotibning insonparvarlik yordamlarini ko‘rsatish, rivojlanish va tinchlik tashabbuslarini yaxshiroq muvofiqlashtirish uchun Birlashgan Millatlar Tashkiloti tizimiga aniq o‘zgarishlar kiritish tashabbusini qo‘llab-quvvatlaymiz», — deyiladi Amerika tomoni tayyorlagan deklaratsiyada.