O‘zbekistonda avtomobillarda ma'lum turdagi gaz ballonlaridan foydalanish taqiqlanadi

O‘zbekistonda 2018 yil 1 fevraldan boshlab STG-2, STG-3 va STG-4 turidagi gaz ballonli uskunalar o‘rnatilgan avtomobillardan foydalanish taqiqlanadi. Bu Vazirlar Mahkamasining 11 oktabrdagi qarorida belgilab qo‘yilgan.

Shuningdek, zavod uskunalari buzilgan STG-1 ballonli transport vositalarni boshqarish taqiqlanadi. Yangi qoidalarda Samarqandning JV MAN Auto-Uzbekistan zavodida ishlab chiqariluvchi, STG-3 gaz ballonlaridan foydalanuvchi MAN A 22 CNG avtobuslari yagona istisnoga aylanadi.

Keyingi yilning 1 fevralidan so‘ng, agarda inspektorlar yo‘llarda STG-2, STG-3 va STG-4 gaz ballon uskunalari, shuningdek, zavod uskunalari buzilgan STG-1 ballonlariga ega avtomobillarni aniqlasalar, ularning egalariga foydalanilishi taqiqlangan transport vositalarini boshqarganligi uchun javobgarlik qo‘llaniladi.

Amaldagi qonunchilikka ko‘ra, foydalanilishi taqiqlangan transport vositalarini boshqarish EKIHning 5 barobari miqdoridagi jarima solinishiga sabab bo‘ladi (748 875 so‘m).