BMT Xon-Shayxundagi kimyoviy hujum kim tomonidan amalga oshirilganini ma'lum qildi 

Suriyaning Idlib viloyatidagi Xon-Shayxun shahriga 2017 yilning 4 aprel kuni yuz bergan kimyoviy hujum Bashar Asad rejimi tarafdorlari tomonidan amalga oshirilgan. Bu haqda BMT va Kimyoviy qurollarni taqiqlash bo‘yicha tashkilot Qo‘shma mexanizmining Xon-Shayxundagi kimyoviy hujum bo‘yicha qo‘shma hisobotida aytiladi. U BMT Xavfsizlik Kengashida taqdim etildi.

Hisobot mualliflarining ko‘rsatishicha, Suriyadagi shaharda yuzdan ortiq tinch aholi vakillari hayotdan ko‘z yumishiga Asad tarafdorlari mas'uldirlar.

Hisobotda ishonch bildirilishicha, «Xon-Shayxunda zarin zaharlovchi gazi Bashar Asad rejimi tomonidan qo‘llangan».

BMT va Kimyoviy qurollarni taqiqlash bo‘yicha tashkilotning Qo‘shma mexanizmi 2015 yilda Suriyada kimyoviy quroldan foydalanish holatlarini aniqlash maqsadida tashkil etilgan.