Moskvadagi qurilishda chiqqan yong‘inda o‘rta osiyoliklar halok bo‘ldilar

Moskvaning shimoli-sharqidagi qurilish maydonchasida o‘rnatilgan vaqtinchalik uychada chiqqan yong‘in oqibatida 6 quruvchi halok bo‘ldi. Bu haqda 6 noyabrda huquq-tartibot idoralari ma'lum qilgan.

Ta'kidlanishicha, qurbonlar is gazidan zaharlangan bo‘lishlari mumkin. Ma'lum qilinishicha, qurbonlar ushbu uychada yashashgan va o‘rta osiyolik bo‘lganlar.   

Taxminlardan biriga ko‘ra, yong‘in qisqa tutashuv yoki elektr isitgichning nosozligi sababli yuz bergan bo‘lishi mumkin.

Rossiya favqulodda vaziyatlar vazirligi matbuot xizmatida ma'lum qilinishicha, yong‘in Skladochnaya ko‘chasida yuz bergan. U haqdagi ma'lumot tungi soat 2:25da kelib tushgan. Yong‘in 12 kvadrat metr joyni qamrab olgan. Uni bir necha daqiqa ichida o‘chirishga muvaffaq bo‘lingan.  

Voqea tafsilotlari va halok bo‘lganlar shaxslari aniqlashtirmoqda.