Senat va Tadbirkorlik sub'yektlari huquqlarini himoya qilish bo‘yicha vakil hamkorlik memorandumini imzoladi

O‘zbekiston Respublikasi Oliy Majlisining Senati hamda O‘zbekiston Respublikasi Prezidenti huzuridagi Tadbirkorlik sub'yektlarining huquqlari va qonuniy manfaatlarini himoya qilish bo‘yicha vakili o‘rtasida hamkorlik memorandumi imzolandi.

Hujjat tadbirkorlik sub'yektlarining huquqlari va qonuniy manfaatlarini himoya qilishni kafolatlovchi normativ-huquqiy bazani takomillashtirish, sohaga oid qonun ijodkorligi, huquqni qo‘llash hamda axborot-tahliliy faoliyatining samaradorligini yanada oshirish maqsadida imzolandi.

Tadbirkorlarning huquqlari himoyasiga qaratilgan ushbu memorandum 2017–2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalarni muvaffaqiyatli amalga oshirishga xizmat qiladi.