Medvedev ikkinchi marta ASeAN sammitidagi jamoaviy fotosuratni “buzdi”

10 noyabrdan boshlab Filippin poytaxti Manilada Janubi-Sharqiy Osiyo davlatlari assotsiatsiyasi (ASeAN) sammiti bo‘lib o‘tmoqda. Bu sammitda shuningdek Rossiya bosh vaziri Dmitriy Medvedev ham ishtirok etmoqda.

13 noyabrda ASeANga kiruvchi davlatlar rahbarlari an'anaviy jamoaviy suratga tushishdi. ASeAN an'anasiga ko‘ra, birdamlikni namoyish qilish maqsadida rahbarlar qo‘llarini chalishtirgancha bir-birlarini qo‘llarini ushlab, go‘yoki bir zanjirni hosil qilgandek suratga tushishadi. Biroq Medvedev buning uddasidan chiqolmay, qo‘llarini keng yoygancha suratga tushdi.

E'tiborlisi, 2010 yil oktabrda o‘tgan ASeAN — Rossiya sammitida o‘sha kezlarda prezident bo‘lgan Medvedev xuddi shunday tarzda qolganlardan “ajralib” suratga tushgandi.

Bunday “o‘zgachalikni” hattoki Vladimir Putin ham o‘ziga ijozat bermagandi. U ilk ASeAN–Rossiya sammitida hamma qatori qo‘llarini chalishtirgancha suratga tushgan.

2016 yilda Sochida o‘tgan ASeAN-Rossiya sammitida Rossiya mudofaa vaziri Sergey Shoygu ASeAN bo‘yicha hamkasblari bilan birgalikdagi suratda bu vazifani uddalay olgandi. Biroq Putin ishtirokidagi fotosessiyada bunday surat olinmagan.