Tramp yadroviy suvosti kemalari boshqa joyga ko‘chirilganini tasdiqladi

AQSh prezidenti Donald Tramp Rossiyaning sobiq prezidenti Dmitriy Medvedev bilan mojaroga kirishganidan keyin «tegishli hududga» joylashtirishni buyurgan ikkita yadroviy suvosti kemasi belgilangan manzilga yetib keldi. Ular «allaqachon bo‘lishi kerak bo‘lgan mintaqada», dedi Tramp 3 avgust, yakshanba kuni kechqurun Nyu-Jyersidan Vashingtonga uchishidan oldin jurnalistlarga.

Biroq u suvosti kemalari qaysi mintaqada joylashgani, ular yadro qurilmalari yoki yadro qurollari bilan jihozlanganiga aniqlik kiritmagan. Amerika yadroviy suvosti kemalarining joylashuvi o‘ta maxfiy sir sifatida ko‘riladi.

Trampning ikkita atom suvosti kemasini «tegishli hududlarga» jo‘natish haqidagi buyrug‘i to‘g‘risida 1 avgust kuni ma’lum bo‘ldi. U bu qadamini Dmitriy Medvedevning «o‘ta provokatsion bayonotlari» bilan izohladi. Qaror «agar bu ahmoqona va g‘azablantiruvchi bayonotlar shunchaki so‘zlardan iborat bo‘lmasa», deb qabul qilindi», deb yozdi Tramp Truth Social ijtimoiy tarmog‘ida. Tramp «so‘zlar juda muhim» va «ko‘pincha kutilmagan oqibatlarga olib keladi» deb tushuntirdi. «Umid qilamanki, bu safar bunday bo‘lmaydi», — deya qo‘shimcha qildi AQSh prezidenti.

28 iyul kuni Medvedev X ijtimoiy tarmog‘ida Rossiyaga qarshi sanksiyalar joriy etish tarafdori bo‘lgan amerikalik senator Lindsi Grem bilan mojaroga kirishdi. Oq uy rahbarining yangi ultimatumi — Ukrainadagi urushni tugatish bo‘yicha kelishuvlarga erishish muddatini 50 kundan 10 kunga qisqartirishni u Rossiya va AQSh o‘rtasidagi «tahdid va urush sari qadam» deb atadi va Tramp hamda Gremni «chollar» deb atadi. Bunga javoban Tramp 31 iyul kuni Truth Social'da Rossiya neftining yirik importchilaridan biri bo‘lgan Hindiston va Rossiya iqtisodlarini «o‘lik» deb atadi. U Medvedevni «tilini tiyib yurishga» chaqirdi va «juda xavfli hududga kirayotganini» qayd etdi.