Adashgan kimsalar...

Ba'zi birovlar pul bilan bitmaydigan ish yo‘q deb hisoblashadi. Har qanday masalani pora evaziga hal qilmoqchi bo‘lishadi. Odatda bunday kimsalar moddiy manfaatdorlik ta'minlansa, qonunga xilof ishlarni ham bajarish mumkin, deb o‘ylashadi, deb yozmoqda “Huquq” gazetasi.

Oddiy kishilar pul evaziga nimagadir erishmoqchi bo‘lsa, buni soddalikka, go‘llikka yo‘yish mumkindir. Ammo, davlat qonunlarini hurmat qilishi va so‘zsiz itoat etishi lozim bo‘lgan rahbarlarning pora berishga urinishlarini qanday oqlash mumkin?

Xorazm viloyatidagi tumanlarning birida hokimning birinchi o‘rinbosari lavozimida ishlagan U.Ibragimov (ism-familiyalar o‘zgartirilgan) va tuman yer resurslari va davlat kadastr bo‘limi boshlig‘i lavozimida ishlagan M.Azimovlar ham o‘z manfaatlarini ko‘zlab, pora evaziga qonunga xilof maqsadlarini amalga oshirmoqchi bo‘lishdi.

Ma'lumki, O‘zbekiston Respublikasining Yer kodeksiga muvofiq, sanoat korxonalari, temir yo‘llar va avtomobil yo‘llari, aloqa va elektr o‘tkazish liniyalari, magistral quvurlar qurish uchun, shuningdek, qishloq xo‘jaligi bilan bog‘liq bo‘lmagan boshqa ehtiyojlar uchun qishloq xo‘jaligiga mo‘ljallanmagan yerlar yoki qishloq xo‘jaligi uchun yaroqsiz bo‘lgan yoxud sifat darajasi past yerlari berilishi lozim.

Shu kodeksga muvofiq, tuman hokimining 2016 yil 2 apreldagi qarori asosida 2017 yilda tuman hududidagi 60 ball bonitetli konturda namunaviy loyihalar asosida turar joylar qurilishi belgilanadi. Tuman hokimining birinchi o‘rinbosari va davlat kadastr bo‘limi boshlig‘i o‘zaro maslahatlashgan holda bu turar joylarni tuman markazlariga yaqin bo‘lgan “Hazorasp” magistrali bo‘yidagi 55 ball bonitetli konturlarga ko‘chirishni reja qilishadi. Boisi, bu ishdan o‘zlari ko‘proq manfaatdor bo‘lar edilar-da. Ammo, bunga o‘z-o‘zidan erishib bo‘lmasligi aniq. Buning uchun avvalo konturlarning ball bonitetini past qilib ko‘rsatib beradigan mutaxassis kerak. Bu mutaxassis respublikadagi mutasaddi idora xodimi bo‘lishi lozim. Shu tariqa ular ana shunday xodimni izlashga kirishdilar.

Ikkovlon o‘zlariga avvaldan tanish bo‘lgan Toshkent shahrida yashovchi Sh.Avezovga murojaat qilishdi. Tayyor oshdan kim bo‘yin tortardi. Bu shaxs 4 ming AQSh dollari evaziga bu ishni bitkazib berishga va'da qiladi. Ikki mutasaddi o‘ylanib, qarz-havola qilib pulni topishdi va Sh.Avezovga yetkazib berishdi. Sh.Avezov “Ana, mana” qilib yurdi-yu, keyin qo‘ng‘iroqlarga ham javob bermay qo‘ydi. Endi U.Ibragimov va M.Azimov boshqa odam izlay boshlashdi. Toshkent shahrida yashovchi bir odam M.Azimovga bu ishni 8 ming AQSh dollari evaziga bitkazib berishini aytdi. Birinchi o‘rinbosar unga 4 ming AQSh dollari topib berdi. Qolgan pulni Sh.Avezovdan qaytarib olib, yangi vositachiga berishni topshirdi. Ammo, Sh.Avezov 2500 AQSh dollari qaytarib berdi. M.Azimov bularni qo‘shib, vositachiga qo‘sh qo‘llab topshirdi. Lekin maqsadlariga yetolmadilar. Pul evaziga davlat xodimini jinoyatga yetaklamoqchi bo‘lgan bu kimsalarning “yurishi”ga shu yerda nuqta qo‘yildi. Pora evaziga davlat manfaatlariga zarar yetkazmoqchi bo‘lgan bu kimsalar oqibatda sudning qora kursisiga o‘tirishdi. Egallab turgan vazifasidan ozod qilindi. Sudning hukmi bilan jazo muqarrarligi ta'minlanib, U.Ibragimov va M.Azimovga nisbatan tegishli qonuniy choralar ko‘rildi.