Farmatsevtika tarmog‘ini rivojlantirish agentligi tekshirishlarda ishtirok etadi

Vazirlar Mahkamasining 18.12.2017 yildagi 993-son qarori bilan O‘zbekiston Respublikasi Sog‘liqni saqlash vazirligi huzuridagi Farmatsevtika tarmog‘ini rivojlantirish agentligi to‘g‘risidagi nizom (keyingi o‘rinlarda – Agentlik) tasdiqlandi. Bu haqda Norma.uz xabar bermoqda.

Eslatib o‘tamiz, Agentlik prezidentning 7.11.2017 yildagi PF–5229-son «Farmatsevtika tarmog‘ini boshqarish tizimini tubdan takomillashtirish chora-tadbirlari to‘g‘risida»gi Farmoni bilan tashkil etilgan. 

Nizom bilan Agentlik faoliyatini tashkil etish, uning asosiy vazifalari va funksiyalari, markaziy apparatining tuzilmasi belgilandi. Agentlikka Prezident tomonidan lavozimga tayinlanadigan va undan ozod etiladigan direktor boshchilik qiladi. U maqomi bo‘yicha sog‘liqni saqlash vazirining birinchi o‘rinbosariga tenglashtiriladi.

Idoraning asosiy vazifalari belgilandi

Unga quyidagilar kiradi:

• dori vositalari, tibbiy buyumlar va tibbiyot texnikasini davlat ro‘yxatidan o‘tkazish hamda davlat sog‘liqni saqlash muassasalari uchun ularning xaridini tashkil etish;
• ijtimoiy dorixonalar tarmog‘ini tashkil etish;
• ijtimoiy ahamiyatli dori vositalari va tibbiy buyumlarga qat'iy narxlarni belgilashda ishtirok etish  va boshqalar.

Ma'lumot uchun: Qayd etilgan narxlar belgilanadigan ijtimoiy ahamiyatga ega dori-darmon vositalari va tibbiyot buyumlari ro‘yxati prezidentning 31.10.2016 yildagi PQ–2647-son qarori bilan tasdiqlangan.

Uning funksiyalari orasida – tekshirishlarda ishtirok etish va ishlab chiqarishni to‘xtatib turish

Agentlik, shuningdek, litsenziya talablari va shartlariga rioya qilinishi ustidan nazoratni amalga oshirishda ishtirok etadi. Farmatsevtika faoliyati bilan shug‘ullanish uchun (dori vositalari va tibbiy buyumlarning chakana savdosi bundan mustasno), shuningdek, giyohvandlik vositalari, psixotrop moddalar va prekursorlarning muomalada bo‘lishi bilan bog‘liq faoliyat uchun litsenziya olgan tadbirkorlik sub'yektlarini tekshirishda ishtirok etiladi.

Quyidagilarni qayd etish zarur:

1) Lisenziya talablari va shartlariga rioya etilishi ustidan nazoratni litsenziyalovchi organ – Sog‘liqni saqlash vazirligi amalga oshiradi. Binobarin, endi u mazkur funksiyani Agentlik bilan birgalikda bajaradi.

2) Quyidagi faoliyat turlaridan birini amalga oshirish uchun litsenziyaga ega bo‘lgan sub'yektlar birgalikdagi tekshirishdan o‘tkazilishi lozim:

• dori vositalarini va tibbiy buyumlarni ishlab chiqarish, tayyorlash, sifatini nazorat qilish, ulgurji realizatsiya qilish;
• ularni yaratish bo‘yicha ilmiy-tadqiqot ishlari;
• dorivor o‘simlik xom ashyosini qadoqlash va ulgurji realizatsiya qilish.

3) Lisenziya talablari va shartlari Farmatsevtika faoliyatini (dori vositalari va tibbiy buyumlarni chakana realizatsiya qilish bundan mustasno)  litsenziyalash tartibi to‘g‘risida nizomda ko‘rsatilgan. 

4) Tekshirishlar quyidagi shakllarda o‘tkazilish mumkin:

• rejali tekshirishlar;
• jismoniy va yuridik shaxslarning qonun hujjatlari buzilganligi faktlari to‘g‘risidagi murojaatlari asosida Nazorat qiluvchi organlar faoliyatini muvofiqlashtiruvchi respublika kengashi qaroriga ko‘ra qisqa muddatli tekshirishlar.  

Shuningdek, Agentlik o‘z vakolatlari doirasida dori vositalari va tibbiy buyumlarning zararli ta'siri aniqlangan taqdirda ularning ishlab chiqarilishini, tayyorlanishini, importini va realizatsiya qilinishini to‘xtatib turishi mumkin.

Ma'lumot uchun: mazkur holatda to‘xtatib turish sud tartibida amalga oshiriladi. To‘xtatib turish muddati va ular yuzaga kelguncha faoliyat to‘xtatib turiladigan shartlar sud qarorida ko‘rsatiladi.

Agentlikning qarorlari tashkiliy-huquqiy shakllaridan qat'i nazar davlat va xo‘jalik boshqaruvi organlari, mahalliy ijro etuvchi hokimiyat organlari, xo‘jalik sub'yektlari tomonidan bajarilishi majburiy hisoblanadi.

Hujjat 19.12.2017 yildan kuchga kirdi.