09:20 / 01.01.2018
10454

Eron prezidenti namoyishga chiqish fuqarolarning huquqi ekanini tan oldi

Foto: © RIA Novosti

Eron prezidenti Hasan Ruhoniy ma'lum qildiki, namoyishlarga chiqish eronliklarning konstitutsiyaviy huquqidir. Ammo u «tanqidni zo‘ravonlikdan farqlash» lozimligiga e'tibor qaratgan. Bu haqda Press TV telekanali xabarida aytildi.

«Namoyishlar, tanqid qilish - odamlarning konstitutsiyaviy huquqidir... Lekin tanqid davlatga zarar keltiruvchi zo‘ravonlikdan farq qilishi kerak», deya prezident so‘zlarini keltirgan telekanal.

O‘tgan haftaning payshanba kunida Eronning ikkinchi yirik shahri Mashhadda tuxum narxlari ikki barobar oshishiga norozilik sifatida 200 kishi ishtirokida norozilik aksiyasi bo‘lib o‘tdi. Ular mamlakat hukumatining iqtisodiy siyosatidan norozilik bildirishdi. Politsiya shu kuni namoyishga chiqqan 52 kishini hibsga olishi norozilik to‘lqinini boshlab berdi.

Keyingi kunlarda mamlakatning boshqa shaharlarida ham namoyishlar boshlandi.

Yakshanba kuni Tehron meri Muhammad Ali Najafiy namoyishchilar ba'zi binolarga zarar keltirgani, yo‘llarda harakatlanish qiyinlashgani haqida ma'lumot berdi.

Hukumat Do‘rud shahridagi tartibsizliklar vaqtida ikki kishi halok bo‘lganini tan oldi va shu bilan birga bu kishilar politsiyachilar tomonidan o‘ldirilmaganini iddao qildi.

Mavzu
Eronda g‘alayonlar to‘lqini

29 dekabr kuni Eronning turli shaharlarida inflatsiya, rahbariyat va katta xarajatlar talab qilayotgan tashqi siyosatga qarshi namoyishlar to‘lqini boshlandi.

Barchasi
Top